"WhatsApp" iki yeni funksiyanı istifadəyə verib

"WhatsApp" istifadəçilərə sosial media bağlantılarını profillərinə əlavə etmək və statuslarını yadda saxlamaq imkanı verən yeni funksiyalar təqdim edib.

Sfera.az "En Son Haber"ə istinadən xəbər verir ki, profil bağlantıları xüsusiyyəti sayəsində istifadəçilər "Instagram" hesablarını "WhatsApp" profillərinə əlavə edə biləcəklər.

Bu yenilik, fərqli platformalar arasındakı əlaqəni asanlaşdıraraq, "WhatsApp" istifadəçilərinə sosial media hesablarını daha rahat paylaşmaq imkanı yaradacaq. Bağlantı əlavə edildikdə, söhbət məlumatları səhifəsinin yuxarısında görünəcək və istifadəçilər bir toxunuşla profilə keçid edə biləcəklər.

"WhatsApp", sosial media bağlantılarının məxfiliyini qorumaq üçün dörd fərqli seçim təklif edir: bağlantını bütün istifadəçilər görə bilər, yalnız kontakt siyahısındakı şəxslər görə bilər,  yalnız seçilmiş şəxslər görə bilər və bağlantı tamamilə gizli saxlanılır.

Digər yenilik isə statusu yadda saxlama funksiyasıdır. Bu xüsusiyyət sayəsində istifadəçilər status bölməsində paylaşdıqları şəkil və videoları birbaşa cihazlarına yükləyə biləcəklər. Bununla üçüncü tərəf tətbiqlərə ehtiyac qalmayacaq və istifadəçilər öz məzmunlarını daha asan şəkildə arxivləyə biləcəklər.
Hazırda bu funksiyalar yalnız "Google Play" Beta Proqramındakı bəzi beta test istifadəçilərinə təqdim edilib. "WhatsApp", qarşıdakı həftələrdə yeniliklərin daha geniş istifadəçi kütləsinə təqdim olunacağını bildirib.

Bəsti Rəfizadə