Dünya iqlimini tənzimləyən axın zəifləyir – Qida mənbələri risk altındadır

Dünyanın ən güclü okean axını olan Antarktik Dairəvi Axını yavaşlamağa başlayıb. Alimlər bu prosesin 2050-ci ilə qədər 20% zəifləyəcəyini bildiriblər.

Sfera.az "BBC Türk"ə istinadən xəbər verir ki, Antarktikanı dövrələyən bu axın, “Gulf Stream” Axınından beş dəfə, Amazon çayından isə 100 dəfə güclüdür.

O, Sakit, Atlantik və Hind okeanlarını birləşdirərək qlobal okean dövriyyəsinin əsas hissəsini təşkil edir və dünyanın iqlimini tənzimləyir.

Lakin Antarktikadakı buzlaqların əriməsi nəticəsində okeana qarışan soyuq və duzsuz su, suyun duzluluq səviyyəsini azaldır və axının gücünü zəiflədir. Bu proses, qlobal iqlimə, ekosistemlərə və qida mənbələrinə ciddi təsir göstərə bilər. Alimlərin araşdırmasına görə, Antarktik Dairəvi Axın buzlaqları qoruyan bir baryer rolunu oynayır. Axının zəifləməsi buzlaqların əriməsini sürətləndirə və dəniz səviyyəsinin qalxmasına səbəb olacaq, dəniz ekosistemlərinə mənfi təsir edərək, bəzi balıq növlərinin azalmasına gətirib çıxaracaq. Eləcə də buğa yosunu kimi adlandırılan yosun növlərinin yayılmasını asanlaşdıra bilər.

Mütəxəssislər bildirir ki, karbon emissiyalarının azaldılması və Antarktika ətrafındakı əriməni məhdudlaşdırmaq bu prosesin qarşısını almağa kömək edəcək. Bunun üçün uzunmüddətli elmi araşdırmalar və beynəlxalq əməkdaşlıq tələb olunur.

Bəsti Rəfizadə