Yaponiyadan və İndoneziyadan olan alimlər tarakanları axtarış-xilasetmə missiyalarında istifadə oluna biləcək kiborq həşəratlara çeviriblər. Osaka Universiteti və Diponegoro Universitetinin tədqiqatçıları tərəfindən inkişaf etdirilən bu yeni texnologiya, kiçik və çətin ərazilərdə kəşfiyyat fəaliyyəti aparmağa imkan verəcək.

Sfera.az "Haber7.com"a istinadən xəbər verir ki, tədqiqatçılar, tarakanların təbii hərəkət qabiliyyətlərindən faydalanaraq onları elektron cihazlarla təchiz ediblər.

Həşəratların antenlərinə və bədənlərinə yerləşdirilən elektrodlar vasitəsilə hərəkətləri idarə etmək mümkündür. Mühəndislik üzrə mütəxəssis Moçammad Ariyanto bildirib ki, kiçik ölçülü robotların istehsalı çətin bir prosesdir, buna görə də təbii bir orqanizmə elektron cihazlar əlavə etməyi seçiblər.

Bu sistem sayəsində Madaqaskar tarakanlarının qum, daş və taxta maneələrlə dolu ərazilərdə uğurla hərəkət etdiyi müşahidə olunub. Yeni yaradılmış “biobiorid davranış əsaslı naviqasiya sistemi” (BIOBBN) sayəsində kiborq həşəratlar müəyyən edilmiş hədəfə çatarkən qarşılarına çıxan maneələri aşırlar.

Sistemin iki fərqli alqoritmi var: sadə mühitlər üçün istifadə edilən sistem böyük elektron bel çantası tələb edir, mürəkkəb ərazilərdə isə yüngül avadanlıqla işləyir. Bu texnologiya zəlzələ və müharibə kimi fəlakətlər zamanı dağıntılar altında qalanları aşkar etmək üçün istifadə oluna bilər. Eyni zamanda, dar tunellər, boru xətləri və insanların çətin daxil ola biləcəyi ərazilərdə kəşfiyyat aparmaq və ekoloji monitorinq aparmaq üçün də dəyərlidir.

Osaka Universitetinin tədqiqatçısı Keisuke Morishima bildirib ki, bu naviqasiya sistemi, mexaniki robotların qarşılaşdığı əsas problemləri aradan qaldıraraq, gerçək dünya şəraitində istifadə üçün uyğun bir həll təqdim edib. Lakin alimlər bu texnologiyanın həşəratların reaksiyalarını daha dərindən araşdırmağa davam edəcəklərini bildiriblər.

Bəsti Rəfizadə

Tarakanlar kiberböcəklərə çevrilir - Alimlərdən yeni kəşf - FOTO