Misir – qədim sivilizasiyanın beşiyi, minilliklərin sirrini özündə saxlayan torpaq. Bu ecazkar ölkənin mərkəzi olan Qahirə tarixin canlı şahididir. Burada dünyanın ən zəngin və möhtəşəm arxeoloji kolleksiyalarından birini saxlayan Qahirə Misir Muzeyi (rəsmi adı ilə Böyük Misir Muzeyi – "Grand Egyptian Museum" (GEM) yerləşir. Bu muzey Misirin möhtəşəm fironlarından tutmuş, unikal qızıl xəzinələrinə qədər minlərlə əsəri sərgiləyir.

Sfera.az bildirir ki, Qahirə Misir Muzeyi 1902-ci ildə açılıb və uzun illər dünyanın ən iri Misir tarixi kolleksiyasını təqdim edən tikili olub. Lakin 21-ci əsrdə, Misirin tarixi irsini daha geniş və müasir formada qorumaq məqsədilə Böyük Misir Muzeyi inşa olunmağa başladı. 2025-ci ilin iyul ayında rəsmi açılışı gözlənilən bu kompleks qədim Misirin xəzinələrini sərgiləmək üçün inşa edilmiş ən böyük arxeoloji məkandır. Muzeyin tikilməsi üçün 1.2 milyard dolların xərcləndiyi bildirilir.

Yeni muzey Giza Piramidalarının yaxınlığında yerləşir və modern dizaynı ilə diqqət çəkir. Muzeyin içərisində nəhəng sərgi salonları, yüksək texnologiyalı təhlükəsizlik sistemləri və ziyarətçilər üçün interaktiv təcrübələr mövcuddur. Burada 100 mindən çox eksponat saxlanılır ki, bunların bəziləri ilk dəfə ictimaiyyətə təqdim olunur.

Böyük Misir Muzeyi Misirin ən önəmli tarixi dövrlərini əhatə edən çoxsaylı eksponatlar təqdim edir. Ən maraqlı nümunələrdən bəziləri:

Tutanxamonun xəzinələri

Misirin ən məşhur fironlarından biri olan Tutanxamonun məqbərəsi 1922-ci ildə arxeoloq Hovard Karter tərəfindən aşkar edilmişdi. Bu məqbərədən çıxarılan qızıl maska, taxt, ziynət əşyaları və müxtəlif ritual əşyalar muzeyin ən dəyərli hissələri arasındadır.

Ramses II-nin heykəli

Muzeyin girişində insanları Ramses II-nin nəhəng heykəli qarşılayır. Bu heykəl qədim Misirin ən güclü fironlarından birinin möhtəşəm hakimiyyətini əks etdirir.

Bolluq, məhsuldarlıq, yeraltı dünya və axirət tanrısı Serapisin heykəli

Serapis xarici görünüşcə yunan kimi təqdim edilsə də, Misir bəzəkləri ilə təsvir edilib və çoxlu kultların birləşmiş ikonoqrafiyası həm bolluğu, həm də dirilməni ifadə edir. Serapisin mənşəyi qədim zamanlarda həm yəhudi, həm də xristian filosofları tərəfindən fərziyyə mənbəyi olub. Eramızın 3-cü əsrinin əvvəllərində Tertullian inanırdı ki, Serapisə olan inanc, ənənəvi olaraq Misirin baş idarəçiliyi vəzifəsinə qoşulduğuna inanılan Patriarx Cozefdən ilhamlanıb. Eyni fikir Talmudda da səslənir

Qədim Misirin divar rəsmləri və heroqliflər

Muzeyin sərgilərində qədim divar rəsmləri və yazılar diqqət çəkir. Burada fironların həyat tərzi, gündəlik yaşam və dini inanclar haqqında dəyərli məlumatlar əldə etmək mümkündür.

Mumiyalar sərgisi

Muzeydə xüsusi mumiyalar bölməsi var. II Ramses, Hatşepsut, Seti I və digər fironların mumiyaları burada qorunur. Bu sərgi Misirin dəfn adətləri və mumiyalaşdırma texnologiyası haqqında dərin bilgilər təqdim edir.

Qədim Misirin məişət və həyat tərzi

Burada qədim misirlilərin istifadə etdiyi əşyalar – keramika, musiqi alətləri, silahlar, geyimlər və gündəlik həyatın digər elementləri sərgilənir. Bu, ziyarətçilərə o dövrün insanlarının necə yaşadığını daha yaxşı təsəvvür etməyə imkan yaradır.

Böyük Misir Muzeyi sadəcə qədim dövrləri sərgiləmir, həm də müasir texnologiyanın arxeologiya ilə necə ahəngdarlıqla işlədiyini nümayiş etdirir. Muzeydə tətbiq olunan artırılmış reallıq (AR), virtual reallıq (VR) və 3D modelləşdirmə vasitəsilə ziyarətçilər, sanki fironlarla eyni zaman dilimində addımlayırlar. Bu yanaşma muzeyi həm də gələcək nəsillərin maraqlarına uyğunlaşdırır.

Qahirə Misir Muzeyi təkcə Misir üçün deyil, bütün dünya üçün dəyərli bir mədəniyyət mərkəzidir. Muzey tarixçilər, arxeoloqlar və turistlər üçün unikal tədqiqat və təhsil məkanıdır. Burada keçirilən beynəlxalq sərgilər, elmi simpoziumlar və təlim proqramları Misirin qədim tarixini yeni nəsillərə çatdırmaqda böyük rol oynayır.
Qahirə Misir Muzeyi təkcə tarixi əsərlərin sərgiləndiyi bir məkan deyil, həm də Misirin möhtəşəm sivilizasiyasını canlı saxlamaq üçün yaradılmış mədəniyyət və elmi mərkəzdir. Burada qədim Misirin sirrlərini kəşf edərək, insanlığın tarixinə daha yaxından toxunmaq mümkündür. Əgər siz tarixi sevirsinizsə və unudulmaz bir səyahət yaşamaq istəyirsinizsə, Qahirə Misir Muzeyini mütləq ziyarət etməlisiniz!

Muzeydən Sfera.az-ın fotoqrafının çəkdiyi şəkilləri təqdim edirik:

Firuzə Əliyeva
Fotolar: Anar Bayramlı

Minilliklərin sirlərinə açılmış qapı - Qahirə Muzeyindən REPORTAJ