Bu situasiyada daha tez aşiq ola bilərsiniz

Psixoloqların apardığı araşdırmalar romantik cazibə ilə qorxu arasında maraqlı əlaqəni ortaya çıxarıb. 

Sfera.az xəbər verir ki, tədqiqatçıların sübutuna əsasən, insanlar təhlükəli və adrenalin dolu vəziyyətlərdə tanış olduqları şəxsləri daha cazibədar hesab edirlər.

Mövzuyla bağlı aparılan ən məşhur eksperiment 1974-cü ildə psixoloqlar Donald Dutton və Arthur Aron tərəfindən həyata keçirilib. Tədqiqatçılar iki fərqli körpüdə təcrübə aparıblar. Biri sabit və alçaq, digəri isə dar, titrəyən və hündür asma körpüdə olub.

Hər iki körpüdə cazibədar bir qadın kişilərə yaxınlaşaraq onlara suallar verib və əlavə sual vermək istəyənlər üçün telefon nömrəsini təqdim edib. Nəticələr isə onu göstərib ki, təhlükəli körpüdə olan kişilər qadının nömrəsini daha çox götürüblər və daha çox geri zəng ediblər. Onlar qadını daha cazibədar kimi qiymətləndiriblər.

Mütəxəssislər bu fenomeni “arousal misattribution” – yəni emosional qarışıqlıq adlandırır. Yüksək adrenalin və qorxu hissi insan beynində romantik hisslərlə qarışa bilər. Bu isə tanışlıq zamanı qarşı tərəfi daha cəlbedici göstərir. 

Fidan Hacızadə