Süni ürəklə 100 gündür ki, həyatdadır - Tibbdə İLK

Ürək çatışmazlığı diaqnozu qoyulan bir pasiyent, süni ürək köçürüldükdən sonra 100 gün həyatda qalmağı bacarıb. 

Sfera.az xarici mətbuata istinadən xəbər verir ki, dünya tibb tarixində ilk olan bu hadisə Avstraliyanın Sidney şəhərində baş verib. Uğurlu əməliyyatdan sonra pasiyent donor ürəklə əvəzlənərək sağlamlığına qovuşub.Pasiyentə yerləşdirilən süni ürək – “BiVACOR”, Kvinslendli biomühəndis Daniel Timms tərəfindən hazırlanıb. Bu cihaz dünyanın ilk implant edilə bilən fırlanan qan nasosu olmaqla fərqlənir. Manyetik levitasiya texnologiyası ilə işləyən bu süni ürək, sağlam insan ürəyindəki təbii qan axınını tənzimləyir.

Süni ürəyin pasiyenti bu qədər uzun müddət həyatda saxlaya bilməsi, ürək çatışmazlığı olan insanlar üçün gələcəkdə uzunmüddətli çıxış yolu ola biləcəyinə dair ümidləri artırıb. Donor ürək tapılana qədər yaşamaq üçün dəstək verən bu cihaz hələlik sınaq mərhələsindədir və geniş istifadə üçün rəsmi təsdiq almayıb.

Qeyd edək ki, Ümumdünya Səhiyyə Təşkilatının məlumatına əsasən, ürək-damar xəstəlikləri hər il təxminən 18 milyon insanın ölümünə səbəb olur.

Fidan Hacızadə