Süni intellektdən yenilik - Beyin gücü ilə idarəetmə...

Süni intellekt dəstəkli beyin-kompüter interfeysi (BCI) texnologiyası iflic insanların həyatında yeni bir dövr açır. 

Sfera.az “TRT Haber”- ə istinadən xəbər verir ki, bu sistem sayəsində pasiyent yalnız düşünərək robot qolunu hərəkət etdirə bilib. O, əşyaları tutub qaldırmaq, şkafı açaraq stəkanı götürmək və su ilə doldurmaq kimi gündəlik işləri bacarıb.

Sistem beynə yerləşdirilən kiçik sensorlar vasitəsilə işləyir. Bu sensorlar pasiyentin əlini hərəkət etdirdiyini xəyal etdiyi anda beynin verdiyi siqnalları toplayır. Daha sonra süni intellekt bu siqnalları analiz edərək robot qolun hərəkət etməsini təmin edir.

İlk vaxtlarda hərəkətlər dəqiq deyildi, buna görə də pasiyent əvvəlcə virtual robot qolla məşq edib. Təlim mərhələsinin ardından isə o, real robot qolu dəqiq və incəliklə idarə etməyi bacarıb. 

Nəticədə pasiyent əşyaları tutub qaldıra bilib, şkafı açaraq stəkanı götürüb və stəkana su doldura bilib.

Ən mühüm yeniliklərdən biri isə bu sistemin fasiləsiz şəkildə 7 ay boyunca problemsiz çalışmasıdır. Əvvəlki texnologiyalar bir neçə gün ərzində funksiyasını itirirdisə, bu sistem uzunmüddətli istifadə üçün böyük irəliləyiş hesab olunur.

Araşdırmaya rəhbərlik edən Dr. Karunesh Ganguly bildirib ki, bu texnologiya zamanla daha da təkmilləşdiriləcək və pasiyentlərin ev şəraitində istifadə edə biləcəyi səviyyəyə çatacaq. 

O, əlavə edib: “Artıq bu sistemin necə işlədiyini bilirik və onun gerçək nəticələr verəcəyinə inanırıq”.

Bu texnologiya iflicl insanların özbaşına yemək yeməsi, su içməsi və gündəlik işlərini yerinə yetirməsi üçün inqilabi bir addım sayılır. Yalnız düşüncə gücü ilə idarə olunan protezlər artıq bir xəyal deyil reallığa çevrilir.

Fidan Hacızadə