Pişiyi üçün "həri" edən, teatdran incik düşən dahi aktrisa - Nəsibə Zeynalovanın ölüm günüdür...
Azərbaycan teatr və kino sənətinin əfsanəvi aktrisası, unudulmaz sənətkar Nəsibə Cahangir qızı Zeynalovanın vəfatından 21 il ötür.
Sfera.az xəbər verir ki, qüdrətli gülüş ustası, səhnəmizin “qaynana”sı dünyasını dəyişsə də, ifa etdiyi rollar, yaratdığı unudulmaz obrazlar hələ də tamaşaçıların yaddaşında və qəlbində yaşayır.
Nəsibə Zeynalova 20 aprel, 1916-cı ildə Bakıda anadan olub. Onun atası Cahangir Zeynalov həm tanınmış tacir, həm də aktyor idi. C.Zeynalov arzu edib ki, övladı onun sənətini davam etdirsin. Ancaq bu arzusunu görmək ona qismət olmayıb. 1918-ci ilin mart ayında erməni daşnakları Bakıda kütləvi qırğınlar törədəndə ailəsi ilə İrana yollanan Cahangir Zeynalov sentyabr ayında Bakıya qayıdanda gəmidə yatalaq xəstəliyinə tutulub və bu xəstəlikdən də qısa zamanda dünyasını dəyişib. Atasını itirdiyi vaxtda Nəsibənin iki yaşı olub.
Aktyor ailəsində dünyaya gələn Nəsibə Zeynalova uşaq yaşlarından sənətə maraq göstərib. O, Azərbaycan teatrında və kinoda bir çox unudulmaz obrazlar yaradıb. 1942-ci ildən ömrünün sonuna qədər, 65 il Azərbaycan Dövlət Musiqili Komediya Teatrında fəaliyyət göstərib. Onun komik rollardakı məharəti, səhnə plastikası və səmimiyyəti tamaşaçıları daim valeh edib. Son illərində isə teatrdan inciyib. Musiqili Komediya Teatrından ayrılıb. Həmin dövrdə qoyulan tamaşalar ona uyğun olmayıb. Üstəlik, Nəsibə xanıma qarşı bəzi xoşagəlməz hərəkətlərin də olduğu söylənilir. Ömrünün son günlərində isə teatr üçün çox darıxaraq deyirmiş: "Heyf, Allah mənə möhlət versəydi, sağlamlığım yerində olsaydı, yenə də oynayardım". Ürəyində teatrla bağlı çoxlu arzuları olan aktrisa rejissorların onu həmişə komik planda görməsindən gileylənib, təəssüflənirmiş.
Nəsibə xanımın istedadı yalnız teatr səhnəsi ilə məhdudlaşmayıb. O, “O olmasın, bu olsun”, “Bəxt üzüyü”, “Görüş”, “Qaynana” kimi məşhur filmlərdəki rolları ilə də tamaşaçıların sevgisini qazanıb. Xüsusilə, Şəhrəbanu obrazı (Qaynana) Azərbaycan kinematoqrafiyasının ən sevilən obrazlarından birinə çevrilib.
Nəsibə Zeynalova Azərbaycan səhnəsində və ekranında yaratdığı obrazlarla xalqın qəlbində dərin iz qoyub. Onun hər bir rolu səmimiyyəti, komik üslubu və məzmunlu ifası ilə seçilib. Aktrisanın özünəməxsus danışıq tərzi, ekspressiv jestləri və həyat dolu enerjisi bu gün də tamaşaçıların xatirəsində yaşayır.
Onun sənətə verdiyi töhfələr dövlət tərəfindən yüksək qiymətləndirilib. Musiqili teatrımızın inkişafında böyük xidmətlərinə görə Nəsibə xanım 24 may 1960-cı ildə Azərbaycan Respublikasının əməkdar artisti, 1967-ci ildə xalq artisti fəxri adına layiq görülüb. "Hicran" musiqili komediyasındakı Qızbacı roluna görə Azərbaycan Dövlət Mükafatı Laureatıdır.
Nəsibə Zeynalova sonuncu dəfə aktyor Cahangir Novruzovla "Əmanət" tamaşası üzərində işləyir. Məşqlər başlansa da, aktrisanın səhhəti korlandığı üçün bu səhnə işi yarımçıq qalır.
1974-cü ildə Rauf Kazımovski onun yaradıcılığı barədə "Aktrisanın təbəssümü" televiziya filmi çəkib. Nəsibə Zeynalovanın obrazları həyatiliyi və real bədii təsvirləri ilə həmişə orijinal görünüb.
Gülləri və heyvanları, xüsusilə pişikləri çox sevib. Harada sahibsiz pişik görsə, ürəyi yanır, götürüb evə gətirirmiş. Onlara qulluq edir, yorğan-döşək də tikirmiş. Bir dəfə isə öz pişiyi üçün qonşu pişiyinə xonça ilə elçi gedir. Ədəb-ərkanla qonşudan pişiyin "həri"sini alır.
Nəsibə Zeynalova 2004-cü il martın 10-da Milli Teatr Günündə Bakıda vəfat edib. Məzarı Fəxri xiyabandadır.
O, aktyor Cahangir Novruzovun anası, Nəsibə Novruzovanın nənəsidir.
Nəsibə Zeynalova təkcə böyük bir aktrisa deyil, həm də Azərbaycan teatr və kino sənətinin ayrılmaz bir hissəsi idi. Onun xatirəsi Azərbaycan mədəniyyətində daim yaşayacaq və yeni nəsillər onun sənət irsindən bəhrələnəcək.
Bu gün sənətsevərlər, tamaşaçılar və həmkarları onu dərin hörmət və ehtiramla yad edirlər. Nəsibə Zeynalovanın gülüşü, səsi və ruhu bizimlədir – tamaşalarında, filmlərində, xatirələrdə...
Firuzə Əliyeva
