Bəzən bir qrup insanın inancı bir müddət sonra cəmiyyət arasında qəbul olunaraq böyük bir mədəniyyətin tərkib hissəsinə çevrilir.

Bunlardan biri də "göz dəymək", "nəzəri toxunmaq" inancı, anlayışıdır. Göz dəymək, müxtəlif mədəniyyətlərdə mənfi təsir və bədbəxtlik gətirən bir hadisə kimi qəbul edilir.

Bəs həqiqətən göz, nəzər varmı?

Mövzu ilə bağlı Sfera.az-a danışan psixoloq Aygün Cəfərova bildirib ki, bu inancın mənşəyi daha çox psixoloji təsirlərlə əlaqəlidir:

"Sosial şəbəkələrdə başqalarının həyatını izləmək, paylaşımlarını görmək və ya şəxsi uğurlarını öz uğursuzluqları ilə müqayisə etmək nəticəsində insanlarda narahatlıq yaranır. Bəzən bu narahatlıq, hətta qısqanclıq və digər mənfi hisslərə yol açır.İnsan nəyə inansa, onun reallaşma frekansı daha yüksəkdir. Məsələn, bir insan paylaşdığı bir uğuruna görə ona göz dəyəcəyinə və başına pis bir iş gələcəyinə inansa, bu olacaq. Bir çox insan məhz bu baxımdan xoş günləri ilə bağlı status paylaşmaqdan qorxur. Göz dəymə fikrindən uzaqlaşmaq üçün pozitiv düşüncəyə fokuslanmaq lazımdır. İnsan öz enerjisini müsbət tərəflərə yönəltdikdə pis niyyətlərin ondan uzaqlaşması mümkündür".

Psixoloq diqqətə çatdırdı ki, fərqli mədəniyyətlərdə göz dəymə anlayışı fərqli izah edilir:

"Məsələn, Latın Amerikasında "mal de ojo" adlandırılan bu anlayış İspan dilində "pis göz" kimi tərcümə olunur və qısqanclığın gücü ilə əlaqələndirilir. Yaxın Şərqdə və Asiyada bir çox inanclarda göz dəymə fəlakətli bir güc kimi qəbul edilir. Bəzi mədəniyyətlərdə isə göz dəymə qarşısında "gözlük taxmaq", "dərman və ya dua oxumaq" kimi qorunma üsullarına müraciət edilir.Göz dəyməyin təsirini izah edən elmi bir nəzəriyyə və sübut yoxdur".

Ülkər Abdurahmanlı

Xoş günləri statusda paylaşdıqda göz dəyir? - MARAQLI AÇIQLAMA