"Qiyməti 50 manatdan başlayır, etik prinsiplərdən kənar prosedurları..."

Qədim kökləri Misirə gedib çıxan Tatu... Taita dilində “tatau” sözündən götürülüb, mənası “insan bədənində yazı” deməkdir. "Tatu" sözünü Avropaya məşhur ingilis səyyahı Ceyms Kuk gətirib. Daha çox dənizçilər arasında yayılan tatu bir müddət sonra aktuallığını itirdi, ta ki amerikalılar onu yenidən dirildənə qədər...

Tatu insanın bədənində özünü ifadə etmə yoludur.

Hər bir tatu (döymə) özündə fərqli bir duyğu, xatirə, hekayə daşıyır.

Bəs tatu sənətinin incəlikləri nələrdir?

Qocaman tarixə malik tatunun sirlərini Müjgan Aşurbəyovadan öyrənəcəyik:

- Tatu etməyə necə başladınız və bu sahəyə marağınız necə yarandı?

- Uşaqlıqdan rəssamlığa böyük marağım olub və bu sahə üzrə təhsil almışam. Sonra düşündüm ki, sənətimi daha fərqli şəkildə icra etməliyəm.Tatunun bir növ canlı incəsənət olduğunu kəşf etdim və bu sahəyə yönəldim. İnsanların özlərini ifadə etməsinə kömək etmək və sənətimi birbaşa onların üzərində canlandırmaq mənim üçün inanılmaz maraqlıdır.

- İndiyə qədər etdiyiniz ən çətin tatu dizaynı hansıdır?

- Hər işin çətin tərəfləri olduğu kimi tatunun da çətin tərəfləri var. Çox çətinlik çəkdiyim tatu dizaynı olmayıb. Çətin vəziyyətdə qaldığım tatu prosesi olub.Bu işə yeni başlamışdım. Bir xanımın bud nahiyəsinə “old school” tərzində qızılgül tatu edirdim. Xanım ağrıya çox dözümsüz və içkili idi. Təcrübəm az olduğu üçün xeyli çətinlik çəkmişdim.

- Müştərilərinizlə necə ünsiyyət qurursunuz və onların istəklərini necə anlayırsınız?

- İlk növbədə onları diqqətlə dinləyir, istəklərini və fikirlərini anlamağa çalışıram. Bəzən dəqiq nə istədiklərini bilmirlər, bu zaman onları yönləndirir, fikirlərini vizual olaraq formalaşdırmağa kömək edirəm. Hər bir tatu bir hekayə daşıdığı üçün qarşılıqlı güvən və rahat ünsiyyət qurmaq mənim üçün çox önəmlidir.

- Tatu prosesinin hansı mərhələləri var?

- Proses bir neçə əsas mərhələdən ibarətdir. Müştəri ilə ilk olaraq dizaynı müzakirə edirik. Eskiz tatu ediləcək nahiyəyə uyğun hazırlanır. Daha sonra dizaynı həmin nahiyəyə köçürüb dəqiqləşdirmə aparırıq. Növbəti mərhələ proses mərhələsidir. İş bitdikdən sonra isə müştəriyə düzgün baxım qaydalarını izah edirik ki, tatunun sağalma prosesi problemsiz keçsin.

- Tatu etməzdən əvvəl müştərilərə hansı tövsiyələri verirsiniz?

- Bir neçə vacib tövsiyələr verilir. Öncəliklə qidalanmalı, prosedura ac gəlməməli, kofein və alkoqol qəbul etməməli olduqlarını deyirik. Rahat geyim geyinməlidirlər.

- Hansı materiallardan və avadanlıqlardan istifadə edirsiniz?

- Tatu prosedurunda yalnız yüksək keyfiyyətli materiallardan istifadə olunur. Hər biri steril və tək istifadəlik olur. “Dinamic mast” kimi çox bilinən markalardan istifadə edirik.

- Tatu etdirmənin riskləri nələrdir və hansı təhlükəsizlik tədbirlərinə riayət edirsiniz?

- Bəzi riskləri var və təhlükəsizlik hər zaman ön planda olmalıdır. Əsas risklər infeksiya, allergik reaksiyalar və düzgün baxılmadıqda tatu bölgəsində problemlərin yaranmasıdır. Qanla işlədiyimizə görə, steril alətlərdən istifadə etmədikdə hepatit xəstəliyi də yarana bilər. Bunun qarşısını almaq üçün yalnız steril avadanlıqlardan istifadə edirəm və gigiyena qaydalarına ciddi riayət edirəm. Həmçinin müştərilərə düzgün baxım tövsiyələri verirəm ki, tatunun sağalma prosesi problemsiz keçsin. Peşəkar və təmiz şəraitdə edildikdə bu risklər minimuma enir.

- Sizcə, ideal tatu dizaynı necə olmalıdır?

- Həm estetik baxımdan cəlbedici, həm də şəxsi mənası olan bir əsər olmalıdır. Hər bir tatu fərdi olmalı, müştərinin xarakterini, hisslərini və hekayəsini əks etdirməlidir. Xətlər və kölgələr harmonik şəkildə işlənməlidir. Ən əsası isə insanın illər sonra belə sevərək daşıya biləcəyi bir sənət əsəri olmalıdır.

- Tatu etdirdikdən sonra müştərilər daha çox hansı məsələlərlə bağlı sizə müraciət edirlər?

- Ən çox tatu baxımı ilə bağlı suallar verirlər. Su ilə təmasdan necə qorunmalı olduqlarını öyrənmək istəyirlər. Bəzən rəngin solması və ya dəri tipinə görə yaranan kiçik dəyişikliklərlə bağlı da müraciət edirlər. Həmçinin bəzi müştərilər zamanla tatularını yenilətmək və ya üzərində kiçik düzəlişlər etdirmək üçün geri qayıdırlar.

- Tatunu tamamilə sildirmək mümkündürmü?

- Bəli, amma bizim ölkədə tatunu tam silməyi bacaran yoxdur. Ya izi qalır, ya da yara kimi görünür.

- Tatu dizaynını hazırlayarkən hansı sənət və dizayn prinsiplərinə riayət edirsiniz?

- Bu, əslində müştərinin istəyinə görə dəyişir. İndividual olur. Əsas məqsəd həm estetik, həm də müştərinin hekayəsini əks etdirən unikal bir sənət əsəri yaratmaqdır.

- Müştərinin istədiyi dizaynla öz stiliniz arasında konflikt olduqda necə qərar verirsiniz?

-İlk növbədə müştərinin fikirlərinə hörmətlə yanaşıram. Onların istəklərini anlamağa çalışıb, dizaynı mənim stilimlə necə uyğunlaşdıracağımı müzakirə edirəm. Bəzən müzakirə edərək hər iki tərəfi razı salan bir nəticə əldə edirəm. Uyğunlaşma çətin olarsa, ən yaxşı nəticəni əldə etmək üçün müştəriyə alternativ yollar təklif edirəm.

- Tatu etdikdən sonra müştərilərin məmnuniyyəti ilə bağlı nə dərəcədə məsuliyyət hiss edirsiniz?

- Müştərinin məmnuniyyəti mənim üçün çox vacibdir. Onların rahatlığı və razılığı işimə qarşı məsuliyyətimi və həvəsimi artırır. Hər zaman ən yaxşı nəticəni əldə etməyə çalışıram. Müştəri məmnuniyyəti mənim üçün ən böyük uğurdur.

- Tatu qiymətləri necə dəyişir?

- Minimal tatu qiyməti 50 manatdan başlayır.

- Müştərinin istəyi sizə etik baxımdan uyğun gəlmədikdə nə edirsiniz?

- Etik prinsiplərə çox önəm verirəm. Əgər müştərinin istəyi etik baxımdan mənə uyğun gəlmirsə, bunu ona açıq şəkildə izah edirəm və başqa usta tapmasını məsləhət görürəm.

- Sizi tənqid edən müştərilərlə necə davranırsınız?

- İlk növbədə sakitliyimi qoruyur və peşəkar davranıram. Müştərinin fikirlərini diqqətlə dinləyir və onları başa düşməyə çalışıram. Hər tənqid inkişafım üçün bir fürsətdir, buna görə də müştərinin narazılığını düzgün şəkildə aradan qaldırmağa cəhd göstərirəm.

- Tatu sənətindəki yeni trendləri hansı mənbələrdən izləyirsiniz?

- Sosial media platformalarında, xüsusilə Instagram və Pinterest-də məşhur tatu artistlərinin işlərini izləyirəm.

- Müştəri üçün unikal dizayn yaratmağın çətinlikləri nələrdir?

- Unikal dizayn yaratmaq hər zaman çətindir, çünki hər müştərinin fərqli zövqü, istəyi və tərzi olur. Əsas çətinliklərdən biri müştərinin istədiyi tərzi və mənanı tam anlamaqdır, çünki bəzən onlar nə istədiklərini dəqiq bilmirlər.

- Tatu sənətində ən çox hansı problemlərlə qarşılaşırsınız?

- Tatu qiymətləri bəzən müştərilər üçün baha olur.Tatudakı qiymətlər işin mürəkkəbliyinə, ölçüsünə, vaxtına və sənətçinin təcrübəsinə görə dəyişir. Bəzi müştərilər sadəcə ucuz variantları axtarır, amma nəticədə bu, keyfiyyət məsələlərinə təsir edir.

- Dəri tipi tatuya təsir edirmi?

- Bəli, tatu nəticəsinə təsir edir. Qalın və yağlı dəri rəngləri çətin qəbul edir, incə və quru dəri isə rəngləri yaxşı qəbul etsə də, daha çox qulluq tələb edir. Bəzi bölgələrdə, məsələn, barmaq və qabırğa kimi yerlərdə dəri daha incədir.Bu da tatu etməyi çətinləşdirir. Hər dəri tipi üçün fərqli yanaşma tələb olunur.

- İndiyə qədər peşmanlıqla xatırladığınız tatu proseduru olubmu?

- Əslində, heç bir peşmanlıq yaşamamışam, ümid edirəm ki yaşamaram.

- Tatu ustalarının işlərinə göstərdikləri diqqət və yaratdıqları əsərlər bu sahənin nə qədər mürəkkəb və dərin olduğunu göstərir. Bədəninə çəkilən hər bir naxış insanın özünü ifadə etmə tərzini, inandığı dəyərləri və keçmişinin izlərini daşıyır...