Avstriya şəhərinin əsas simvoluna çevrilmiş Motsart şokoladları eksklüziv hüquqlarını itirir

Avstriyanın Salzburq şəhərinin əsas simvolu Motsart şokoladları hesab olunur.

 

Sfera.az bildirir ki, ildə 57 milyon Motsart şokoladı istehsal edən qənnadı fabriki kakaonun baha olması səbəbindən bağlanıb.
 

Konfet fabriki müflisləşəndən sonra Avstriya suveniri "Motsartkugeln" və ya sadəcə olaraq "Motsart" konfetləri bəstəkarın vətənində istehsal olunmayacaq. Şəhər Motsart konfetlərinə eksklüziv hüquqlarını itirir.

19-cu əsrdə icad edilən məşhur konfetlərin istehsalı Çexiyaya köçürülə bilər.

Salzburqa gələnlər hava limanlarında Volfqanq Amadey Motsartla bağlı yüzlərlə əşya görə bilər: bəstəkarın təsviri olan köynəklər, qolf topları və Playmobil fiqurları suvenir dükanlarını və vergidən azad dükanları doldurur.
 

Lakin Avstriya şəhəri hamının ən sevimli suvenirinə olan eksklüziv hüququnu itirdi. Parikdə musiqi möcüzəsini əks etdirən folqa qablaşdırmada kiçik Motsart şokoladları artıq satılmayacaq.


Sonuncu Salzburq Motsartkugel (Motsart topu) - 19-cu əsrin sonunda ixtira edilmiş marzipan, püstə və nuqa ilə doldurulmuş şokolad ötən həftə Qrödiq şəhərətrafı qəsəbəsindəki konveyerdən buraxılıb.
 

İldə 57 milyon Motsartkugel şokoladı istehsal edən fabrik, istehsalçı “Salzburg Schokolade”nin qismən yüksələn kakao qiymətləri səbəbiylə müflis olması və 65 iş yerinin itirilməsindən sonra bağlanıb.
 

Bu ləzzətin saxtaları çox olsa da, Avstriya şəhərində ixrac üçün yalnız orijinal "Echte Salzburger Motsartkugel" kütləvi istehsal edilib.


Yerli mənşəyinə baxmayaraq, şokolad istehsal etmək üçün lisenziya bir neçə ildir ki, “Oreo” peçenyeləri və “Toblerone” şokoladları kimi beynəlxalq markaların istehsalçısı olan Amerika konqlomeratı “Mondelez International”a məxsusdur.
 

Üç illik xilasetmə səylərinə baxmayaraq, “Salzburg Schokolade”nin iflasından sonra “Mondelez” Motsart şokoladları istehsal etmək üçün regional istehsal şəbəkəsində yeni bir yer axtaracağını bildirib.
 

Yerli medianın təsdiqlənməmiş məlumatlarına görə, ən çox ehtimal olunan istiqamət istehsal xərclərinin aşağı olduğu Çexiyadır.


Qeyd edək ki, Avstriyanın dördüncü ən böyük şəhəri olan Salzburq 150.000-dən bir qədər çox əhalisi olan, ölkəsinə böyük mədəni irs bəxş edən və hər il çoxlu turistləri cəlb edən Motsartla ayrılmaz şəkildə bağlıdır.


Motsart Salzburqu heç vaxt sevməyib

Uşaq vaxtı vunderkind olmuş Motsart özü isə arxiyepiskop sarayında xidmət etdiyi məmləkəti ilə mürəkkəb münasibətlərə malik idi. Motsart məktublarında Salzburqun "darıxdırıcı, əyalət və havasız" olduğunu gördüyündən şikayətlənirdi. Nəhayət, 20 yaşında daha kosmopolit paytaxt Vyanaya köçərək burada uğur qazanmağa başlayıb.
 

Motsartın 35 yaşında vaxtından əvvəl ölümündən sonra borca ​​girən dul həyat yoldaşı Konstanze nəhayət Salzburqa qayıdıb. O, Motsartın mirasını qoruyub saxlamaqla, pul da qazanmış oldu.

Aysel