Karmik numerologiya və tale matrisasının həyat yolumuzdakı rolu nədir? - ARAŞDIRMA
İnsanlar hər zaman talelərinin sirrini anlamaq və gələcəklə bağlı suallara cavab tapmaq üçün müxtəlif yollar axtarıblar. Bu yollardan biri də karmik numerologiya və tale matrisası anlayışlarıdır.
Sfera.az bildirir ki, sözügedən anlayışlara görə, doğum tariximizdəki rəqəmlər həm də həyat yolumuzu, karmik borclarımızı, qarşılaşacağımız çətinlikləri və hətta hansı peşə sahəsində uğurlu ola biləcəyimizi göstərə bilir.
Bəs bu sistemlər nə dərəcədə etibarlıdır?
Belə ki, karmik numerologiya qədim numerologiya sistemlərindən biridir. Bu nəzəriyyəyə görə, hər bir insan bu dünyaya əvvəlki həyatında yığdığı karmik borclarla gəlir və bu borcları ödəmək üçün müəyyən təcrübələrdən keçməlidir. “Karmik borc” keçmiş həyatlarda edilmiş səhvlərin bu həyatda bərpa edilməsi üçün öyrəniləcək dərsləri təmsil edir. Bu borcları başa düşmək üçün, numerologiya insanın doğum tarixini və adını hesablamaqla müəyyən rəqəmləri ortaya çıxarır.
Məsələn, inanılır ki, doğum tarixi 13, 14, 16 və 19 kimi müəyyən rəqəmlərə üst-üstə düşürsə, deməli, karmik borc var. Karmik numerologiyaya görə, insanın həyat yolundakı çətinlikləri, şanssızlıqları və problemləri karmik borclardan qaynaqlanır. Həmin borcların hansı hissədə olduğunu başa düşməklə, insan daha balanslı və mənalı bir həyat yaşamaq üçün düzgün addımlar ata bilər.
Numerologiyada rəqəmlərin enerjisi olduğuna inanılır. Məsələn, doğum tarixi rəqəmləri - gün, ay və il ayrı-ayrılıqda toplanır və ümumilikdə 1-dən 9-a qədər bir rəqəm çıxarılır. Hər rəqəmin isə xüsusi mənası var:
1: Liderlik, güc, 2: Əməkdaşlıq, balans, 3: Yaradıcılıq, ifadə, 4: Sabitlik, səbir, 5: Azadlıq, dəyişmə, 6: Məsuliyyət, harmoniya, 7: Ruhani axtarış, düşüncə, 8: Uğur, maddi bolluq, 9: Humanitar yardım, xidmət.
İnanca görə, karmik borc rəqəmi 13 olarsa, keçmiş həyatda tənbəllik və məsuliyyətsizlik kimi mənfi hərəkətlər edilmiş ola bilər və bu həyatda daha çox çalışqan olmaq tələb olunur. 19 rəqəmi isə keçmişdə güc mövqelərinin sui-istifadəsini göstərə bilər və bu həyatda müstəqillik və dürüstlük üzərində iş aparılmalıdır.
Tale Matrisası nədir?
Bu sistemin əsasını qədim yunan riyaziyyatçısı Pifaqor qoyub, buna görə də bəzən “Pifaqor Matrisası” adlandırılır. Tale matrisasına əsasən, insanın doğum tarixi numeroloji sistemlə xüsusi bir cədvələ yerləşdirilir, müəyyən rəqəmlər analiz olunur. Bu matriksdə doğum tarixindəki hər bir rəqəm insanın həyatı və taleyi ilə bağlı ipucları verir. Doğum tarixi gün, ay, il olaraq ayrılıqda təhlil olunur. Daha çox təkrarlanan rəqəmlər insanın həyatında daha güclü təsirləri olduğunu göstərir. Tale Matrisasına əsasən rəqəmlərin mənası belədir:
1: Mənlik, liderlik, iradə gücü, 2: Hisslər, intuisiya, 3: Yaradıcı enerji, ifadə, 4: Praktiklik, sabitlik, 5: Dəyişim, hərəkət, 6: Məsuliyyət, ailə, 7: Ruhani enerji, dərin düşüncə, 8: Güc, maddi uğurlar, 9: Karmik enerjilər, humanizm...
Məlumata görə, bu matris insanların həyatı ilə bağlı müəyyən proqnozlar verə bilər – məsələn, insan hansı xüsusiyyətlərə malik olduğunu, hansı çətinliklərlə üzləşəcəyini, hansı peşə sahələrində uğurlu olacağını, hətta hansı xəstəliklərə daha meyilli olduğu... Tale matrisası həm də insanın ömrü ilə bağlı müəyyən proqnozlar verir. Lakin elmi baxımdan doğum tarixinin insanın həyatı üzərindəki təsiri ciddi şəkildə təsdiq olunmayıb. Astrologiya, numerologiya və tale matrisası kimi sistemlər, əsasən inanclara və ezoterik biliklərə əsaslanır.
Günay
