Antarktidada buzların əriməsi daha bir təhlükəni ortaya çıxaracaq - Vulkan...
Antarktidada əriyən buzlar 100 gizli vulkanın püskürmə təhlükəsini yaradır.
Sfera.az xəbər verir ki, Amerika Braun Universiteti və Viskonsin-Madison Universitetinin tədqiqatçıları Qərbi Antarktika Rift Sistemində gizli vulkanları tədqiq edərkən bu nəticəyə gəliblər.
Belə ki, qalınlığı 1-2 km-ə çatan kütləvi buz təbəqəsi altında aktiv vulkanik qırılma var. Qlobal istiləşmə buz təbəqəsinin aktiv əriməsinə gətirib çıxararsa, Yer qabığında gərginlik və təzyiqdə, eləcə də orada yerləşən maqma kameralarının strukturunda böyük dəyişikliklər baş verəcək. Onlar vulkanik reaksiyaya səbəb ola bilər ki, bu da domino effekti ilə buzların əriməsini daha da sürətləndirəcək və iqlim böhranının qlobal nəticələrini daha da gücləndirəcək.
Qeyd edilib ki, Qrenlandiyada buzlaqlar hər il təxminən 270 milyard ton azalır və Antarktida hər il təxminən 150 milyard ton buz itirir. Alimlər bu prosesin getdikcə sürətlənməsindən olduqca narahatdır.
Tədqiqatçılar bilirlər ki, keçmiş dövrlərdə buzlaqların əriməsi zamanı vulkanik aktivlik də artıb, indi də oxşar proseslər başlayıb.
Tədqiqat müəllifləri etiraf edirlər ki, subqlasial vulkan püskürmələri yerüstü ilə müqayisədə səthə daha az təsir göstərir. Amma onlar da aşağıdan buzu yavaş-yavaş məhv edir və zəiflədir, yenidən əriməsini sürətləndirirlər. Bu qapalı geribildirim dövrəsi yaradır və nəzarət etmək çətindir.
Firuzə Əliyeva
