Süni intellekt (Sİ) texnologiyaları sürətlə inkişaf edərək bir çox sahədə tətbiq olunur və işçi qüvvəsinə olan tələbatı dəyişdirir. Bu texnologiyalar məhsuldarlığı artırsa da, bəzi sahələrdə iş yerlərinin azalmasına səbəb ola bilər.

Bəs hansı sahələrdə insan əməyinə ehtiyac qalmayacaq?

Sfera.az tədqiqat, statistika və elmi araşdırmalar əsasında hazırladığını analizini təqdim edir:

Süni intellektin təsir etdiyi sahələrdən biri istehsalat və sənaye sektorudur. Belə ki, avtomatlaşdırılmış robotlar və maşınlar artıq istehsalat proseslərində insan işçiləri əvəz edir. Avtomobil istehsalı kimi sahələrdə robotlar montaj, qaynaq və rəngləmə kimi işləri daha sürətli və dəqiq şəkildə yerinə yetirir. McKinsey & Company tərəfindən yayımlanan bir hesabat göstərir ki, istehsalat işlərinin təxminən 60%-i avtomatlaşdırıla bilər.

Avtonom nəqliyyat vasitələri gələcəkdə sürücülərə ehtiyacı azalda bilər. "Tesla" və "Waymo" kimi şirkətlər artıq avtonom avtomobilləri sınaqdan keçirir, bu isə yük maşını sürücüləri və taksi xidməti işçiləri üçün təhlükə yaradır. PwC proqnozlarına görə, 2030-cu ilə qədər dünya üzrə nəqliyyat işlərinin 30%-i avtomatlaşdırıla bilər.

Süni intellekt vasitəsilə mühasibatlıq, kredit analizi və müştəri dəstəyi kimi işlər də avtomatlaşdırılır. Chatbotlar və algoritmlər müştəri sorğularını cavablandırmaqla yanaşı, investisiya tövsiyələri də verir. Oxford Universitetinin araşdırmasına əsasən, bank xidmətlərində avtomatlaşdırma səviyyəsi 43%-ə çata bilər.

Yeniliklər sağlamlıq sahəsinə də təsirsiz ötüşmür. Süni intellekt diaqnostika və məlumat analizi işlərini sürətləndirir, bəzi texniki personal işlərini itirə bilər. IBM-in Watson texnologiyası xəstəliklərin erkən mərhələdə aşkarlanmasında istifadə olunur.

Gələcəkdə insana ehtiyacın qalmayacağı işlər əsasən mühasibatlıq, məlumat daxil etmə, kuryer xidməti kimi rutin təkrarlanan işlər, maşın sürücüləri, kassirlər, anbar işçiləri kimi avtonom xidmətlər ola bilər. Həmçinin müştəri xidməti operatorları və IT dəstək komandalarının bir çoxu süni intellektlə əvəz edilə bilər.
Dünya İqtisadi Forumu (WEF) tərəfindən yayımlanan bir hesabat göstərir ki, 2025-ci ilə qədər 85 milyon iş avtomatlaşdırma səbəbindən yox ola bilər.

İşsiz qalanlar siyahısında aşağı ixtisaslı işçilər, yeni texnologiyalara uyğunlaşmayan şəxslər, avtomatlaşdırıla bilən sahələrdə çalışanların olacağı proqnozlaşdırılır.
Yaradıcı və analitik düşüncə tələb edən işlər isə avtomatlaşdırmadan daha az təsirlənəcək. Süni intellekt idarəçiliyi, data analitikası və kibertəhlükəsizlik kimi sahələrdə iş yerləri artacaq.

Firuzə Əliyeva

Süni intellekt bu şəxsləri İŞSİZ QOYACAQ