Elektronik avadanlıqlar alarkən nələrə diqqət etməliyik? - ARAŞDIRMA

Son dövrlərdə elektronik avadanlıqlarda təhlükəsizlik problemlərinin artması cəmiyyətdə ciddi narahatlıq doğurur. Robot tozsoranlardan tutmuş elektrik avtomobillərinə qədər müxtəlif cihazların alovlanması və ya partlaması kimi hallar yalnız maddi zərər verməklə kifayətlənmir, həm də insanların həyatını risk altına qoyur. Ən son hadisə isə Nyu-Yorkdakı məşhur “Trump International” otelinin qarşısında baş verib. “Tesla Cybertruck” markalı elektrik avtomobilinin partlaması böyük səs-küyə səbəb olub. Təxribat ehtimalı irəli sürülsə də, araşdırmalar hələ davam edir. Bu cür hallar elektronika alətlərinə olan inamı ciddi şəkildə sarsıdır. 

Maraqlıdır, bədbəxt hadisələrin baş verməməsi üçün elektronik avadanlıq alarkən və istifdadəsi zamanı nələrə diqqət edilməlidir?

Sfera.az bildirir ki, elektronik avadanlıq alarkən diqqət edilməli ən vacib məqamlardan biri məhsulun sertifikatının olmasıdır.

Belə ki, məhsulun beynəlxalq standartlara uyğunluğunu təsdiqləyən sertifikatlara malik olub-olmaması yoxlanılmalıdır. CE, RoHS, UL kimi işarələr cihazın təhlükəsizliyini təmin edən əsas göstəricilərdir. Həmçinin orijinal məhsulların xüsusi seriya nömrələri və orijinallıq təsdiqləri olur. Saxta və ya ikinci əl cihazlardan çəkinilməsi daha məqsədəuyğundur. Bundan başqa, adətən tanınmış brendlərin məhsulları təhlükəsizlik standartlarına daha uyğun olur. Ucuz və naməlum istehsalçılardan alınan cihazlar, saxta şarj cihazları, batareyalar və digər aksesuarlar təhlükəsizlik risklərini artırır.

Alınan cihazın zəmanət müddəti və texniki xidmət şəbəkəsi haqqında məlumat əldə edilməlidir. İstifadə qaydaları diqqətlə oxunmalı və təklif edilən göstərişlərə riayət edilməlidir. Xüsusilə enerji yükləmə prosedurları ilə bağlı qaydaları pozulmamalıdır. Elektron cihazların havalandırılma sistemlərinin normal işləməsi təmin edilməlidir. Məsələn, cihazları qızdırıcıların və ya günəş şüalarının altında saxlamaq olmaz.

Əsas məqamlardan biri də cihazların nəzarətsiz qoyulmamasıdır. Xüsusilə şarj zamanı cihazları nəzarətsiz qoymaqdan çəkinilməlidir. Bu, partlayış və ya yanğın riskini artırır.

Əgər cihazda hansısa problem yaranarsa, onu qeyri-peşəkar şəxslərə təmir etdirmək olmaz. Məhsulun zəmanəti varsa, mağazaya yaxınlaşmalı, ya da markanın rəsmi texniki servisinə müraciət edilməlidir.

Elektronika artıq həyatımızın ayrılmaz hissəsidir. Buna görə də, həm istehsalçılar, həm də istifadəçilər daha məsuliyyətli davranmalıdır. İstehsalçılar məhsullarının təhlükəsizliyini artırmaq üçün əlavə tədbirlər görməli, istehlakçılar isə diqqətli seçim və istifadəyə üstünlük verməlidir.

Unutmayaq ki, düzgün yanaşma ilə texnologiyanın yaratdığı riskləri minimuma endirmək mümkündür. Elektronik cihazlar həyatımızı asanlaşdırdığı kimi, təhlükəsizliyimizə də xidmət etməlidir.

Firuzə Əliyeva