Təyyarə fobiyasından necə qurtulmaq olar? - Psixoloqdan TÖVSİYƏ
Xəbər verdiyimiz kimi, çərşənbə günü səhər saatlarında Qazaxıstanın Aktau şəhəri yaxınlığında Bakı-Qroznı reysi ilə uçan Azərbaycan Hava Yollarına məxsus təyyarə qəzaya uğrayıb. Təyyarənin göyərtəsində 62 sərnişin və 5 ekipaj üzvü olmaqla 67 nəfər olub. Hadisədən sonra əsas müzakirə obyektinə çevrilən məsələlərdən biri də insanlarda yaranma ehtimalı artan təyyarə fobiyasıdır.
Bu barədə Sfera.az-a açıqlama verən klinik psixoloq Fuad Əsədov sözügedən məsələ ilə bağlı saysız mesajlar aldığını deyib.
“Xüsusilə tez-tez uçuş edən insanlar bu cür suallar ünvanlayırlar. Artıq hamısı qorxu, panika və stress yaşamağa başlayıb. Bu cür hadisələr baş verəndə psixoloji sağlam qalmaq və rasional düşünmək üçün bir neçə şeyi bilməlisiniz. Deməli, bir təyyarənin qəza ehtimalı 11 milyonda birdir. Təyyarədə bir sərnişinin ölmə ehtimalı isə 205 mində birdir. Bu rəqəm avtomobil qəzasının yaşanma ehtimalından 62 dəfə azdır. Təyyarə qəzasının yaşanma ehtimalı gündəlik həyatda baş verə biləcək digər risklərdən çox aşağıdır”.
Psixoloq bildirdi ki, belə vəziyyətlərdə panikaya düşməmək və qorxunu yaxına buraxmamaq lazımdır: “Bir dəfə qapını qorxuya açdınızsa, qorxu evinizdən içəri girəcək”.
Günay
