Bu estetik əməliyyat kişilər arasında geniş yayılıb - Qiyməti isə...

Qəmzəli insanlara çoxumuz həsəd aparırıq və qəmzə yaratmaq üçün həll yolları axtarırıq. Alimlər dünyada yalnız 20 faiz insanda olan təbii qəmzəni üz əzələlərinin qısa olması səbəbindən yaranan bir problem kimi qiymətləndirir. Bir çox insanlar bunu gözəllik və cəzbedicilik əlaməti olaraq görürlər.

Mütəxəssislər qəmzələr irsi xarakterli olduğunu və əsasən, atadan ötürüldüyünü bildirirlər. Amma bəzi insanlar müxtəlif üsullarla, makiyajla və əzələ məşqləri ilə qəmzə yaratmağa çalışırlar.

İnsanların süni qəmzə yaratma cəhdlərinə tarixdə də rast gəlinir.

1936-ci ildə İzabel Gilbert bunun üçün sadə mexanizmli alət yaradıb. Onun icadı bir-birinə yayla bağlanan 2 düymədən ibarət olub. Daha sonra həmin alətin xərçəngə səbəb olduğu əsas gətirilərək satışı qadağan edilib.

Son zamanlar isə qalıcı qəmzə yaratmaq üçün süni qəmzə əməliyyatı edilir. Yeni trend olan qəmzə əməliyyatı isə yalnız qadınlar arasında deyil, kişilər arasında da geniş yayılıb.

Avropa ölkələrində 1500 dollara başa gələn bu əməliyyata təkcə qəmzəsizlər deyil, yaşlanma, kökəlmə və s. səbəblərdən qəmzələrini itirən insanlar da müraciət edirlər. Bu əməliyyat zamanı pasientin yanağında 1-2 sm-lik bir kəsik edilir və yanaq əzələsinin bir hissəsi çıxarılaraq süni çuxur yaradılır.

Nəticədə insanlar estetik görünüş əldə etdiklərini düşünürlər.

Ülkər Abdurahmanlı