Qadınların üzü buna görə çox tüklənir - Həkimdən AÇIQLAMA

Xanımların əziyyət çəkdiyi problemlərdən biri də tüklənmədir. Qadınların çoxu üzünün hədsiz dərəcədə tüklənməsindən şikayətçidir.

Bəs bu problemin kökündə hansı xəstəlik dayanır?

Mövzu ilə bağlı Sfera.az-a danışan ginekoloq Sevinc Musayeva bildirib ki, orqanizmdə hormonal pozuntunun əmələ gətirdiyi problemlərdən biri də tüklənmədir.

“Bu zaman qadınlarda kişi hormonları, testosteronin miqdarı artır. Buna səbəb, yumurtalıqlarda hormonların öz fəaliyyətini dəyişməsi ilə əlaqədardır. Qadınlarda sümük böyüməsi, saçların tökülməsi, tez-tez tərləmə hormonal pozuntunun əlamətidir”.

Həkim qeyd edib ki, hormonal pozğunluğu olan qadınlar çay, kofe kimi içkilərdən, duzlu və yağlı yeməklərdən uzaq olmalıdırlar.

“Hormonal pozuntu bədəndə olan hormon balansının dəyişməsidir. Hormonlar əsasən vəzlərdə olur və ifraz olunan qanın bədənin bütün hissələrinə yayılmasında böyük rol oynayır. Hormon balansı pozulduqda piy toxumasından hormonlar ifraz olunur və bu zaman xəstəliklər yaranır. Qadınlarda infarkt riski artır və yuxu problemi yaranır. Bu kimi problemləri olan insanlar mütləq həkimə müraciət etməlidirlər”.

Ülkər Abdurahmanlı