“Apple” şirkəti ilk qatlana bilən “iPhone” modelinin hazırlanması və istehsalını dayandırıb. 

Sfera.az xəbər verir ki, bu barədə “MacRumors” nəşri məlumat yayıb. 

Nəşrin məlumatına görə, şirkət çevik displeyli smartfonun yaradılması üzərində işi müvəqqəti dayandırıb. “Apple” mühəndisləri uzun müddət cihazın konseptual nümunələrini diqqətlə sınaqdan keçiriblər. Yoxlama zamanı məlum olub ki, prototiplərin heç biri “Apple”ın keyfiyyət standartlarına cavab vermir. 

Digər telefon şirkətlərinin qatlanan modellərini də öyrənən və sınaqdan keçirən “Apple” şirkəti bəzi telefonların modellərinin istifadə zamanı texniki problemlərlə üzləşdiyini aşkarlayıb. Məsələn, “Samsung”un ən son qatlana bilən panellərinin bir neçə günlük aktiv sınaqdan sonra qırıldığı məlum olub. 

Buna görə də “Apple” daha dözümlü çevik ekranın yaradılmasına qədər qatlanan ekranlı modelin istehsalını təxirə salıb. 

“MacRumors” yazır ki, “Apple” mütəxəssisləri 2016-cı ildən bəri qatlanan ekranlı modellər üzərində işləyib. Şirkət digər markaların qatlanan modellərlə bazar payının artdığını müşahidə etdiyindən belə bir addım atıb. Lakin aparılan sınaqlar hələlik qatlanan modellərin səmərəli olmadığını üzə çıxarıb. 

Vasif