Türkiyədə yeni evlənənlərə 48 aylıq güzəştli kredit VERİLƏCƏK

Türkiyədə yeni evlənən cütlüklərə 48 aylıq güzəştli kredit veriləcəyi barədə qərar imzalanıb.

Həmin qərara əsasən, yeni evlənən cütlüklərə, Ailə və Gənclik Bankı vasitəsi ilə 150 min TL faizsiz evlilik krediti veriləcək.

Bəs həmin qərar Azərbaycanda tətbiq edilə bilərmi?

Mövzu ilə bağlı Sfera.az-a danışan sosioloq Əhməd Qəşəmoğlu bildirib ki, ölkəmizdə ailə quran gənclərin evlilik kreditinə ehtiyacı var.

“Çünki bizdə ailə qurmaq, toy etmək böyük xərc tələb edir. Məhz bu baxımdan, evlilik kreditlərinin ayrılmasının evlənən cütlüklərə böyük faydası olar”.

Sosioloq diqqətə çatdırıb ki, evlilik krediti mexanizmi yaradılarkən, xüsusilə, diqqətli olmaq lazımdır.

“Fırıldaqçıların yalandan nigah hesabına kredit ala bilmək imkanı olmamalıdır. Kredit alan şəxslər xüsusi araşdırılmalıdır. Evlilik krediti üçün müraciət edən şəxslərin evlənib-evlənmədikləri müəyyənləşdirilməlidir”.

Ülkər Abdurahmanlı