Kişilər qadınları cəlb etmək üçün necə davranmalıdır? - "Qadınların əsas şikayəti..."

Son zamanlar kişi-qadın münasibətlərinin bir çoxu ya tez sonlanır, ya da uğursuz nəticələnir. Bunun əsas səbəblərindən biri də, kişilərin etdiyi bəzi davranışlar qadınlar tərəfindən xoş qarşılanmır və qadınları cəlb etmir.

Bəs kişilər qadınları cəlb etmək üçün necə davranmalıdır?

Mövzu ilə bağlı Sfera.az-a danışan psixoloq Ülviyyə Kərim bildirib ki, ilk olaraq diqqət yetirilməli məqam, kişilərin xarici görünüşü və nəfəsinin təravətli olmasıdır.

"Çünki qadınlar kişilərdən gələn xoş ətirləri və qoxuları sevirlər. Digər əsas amillərdən biri də, kişilərin səliqəli geyinməsidir. Hər bir xanım yanında yaraşıqlı görünən birini arzulayar. Cütlüklər arasında olan problemlərdən biri dinləmə qabiliyyətinin aşağı olmasıdır. Tərəflərin hər biri özü haqda danışmağa daha meyilli olurlar. Münasibətin isə əsas başlıca əlaməti qarşı tərəfi dinləməkdir. Məhz bu baxımdan, qadın öz həyatı və işi barəsində danışarkən onu diqqətlə dinləmək lazımdır".

Ülviyyə Kərim diqqətə çatdırıb ki, kişilər bir müddət sonra partnyorlarına qadağa qoymağa başlayır.

“Lakin bu düzgün yanaşma deyil. Qadınlar da kişilər kimi sərbəstliyi əlindən alınan münasibətdən tez sıxılırlar. Qadınların kişilərlə bağlı əsas şikayəti onların diqqətsizliyi olur. Kişilərin bir çoxu, qadınların etdiyi dəyişikliklərin fərqində olmur. Bu da qadınların xoşuna gəlməyən məqamlardan biridir”.

Psixoloq son olaraq əlavə edib ki, kişilər qadınlara xoş sözlər deməkdən çəkinməməlidir.

Asya