Piyadalar üçün ən təhlükəli avtomobillər - ARAŞDIRMA
Araşdırmalara görə, “boxy” modellər piyadalar üçün daha təhlükəlidir.
Sfera.az xəbər verir ki, Yol Təhlükəsizliyi Sığorta İnstitutunun (IIHS) dərc etdiyi araşdırmaya görə, yüksək ön dizaynı və kəskin xətləri olan avtomobillər mümkün qəzalarda piyadalara daha çox ölümcül ziyan vurur.
IIHS bu hesabatı minik avtomobilləri, pikaplar və yolsuzluq avtomobilləri də daxil olmaqla bir piyadanın iştirak etdiyi təxminən 18.000 müxtəlif qəzaları araşdıraraq hazırlayıb. Toplanan məlumatlara görə, kapotun hündürlüyü 40 düymdən (101 sm) yüksək olan avtomobillər hündürlüyü 30 düym (76 sm) və burnu yuvarlanan avtomobillərə nisbətən 45% daha ciddi ziyana səbəb olur. Həmçinin araşdırmaya görə, kapotun hündürlüyü 30-40 düym (76-101 sm) və düz ön dizaynı olan avtomobillər yaralanma riskini artırır.
IIHS prezidenti David Harkey bildirib ki, bu gün piyada keçidlərindən keçərkən qarşılaşdığımız nəqliyyat vasitələri olduqca qorxuludur:
"Ön tərəfdən baxanda aqressiv görünüşə malik avtomobillər həqiqətən daha çox ziyan vurur".
IIHS Baş Tədqiqat Mühəndisi Ven Hu bildirib ki, istehsalçılar avtomobillərinin kapotlarını və ön barmaqlıqlarını daha çox yamaclı dizayn etməklə zərəri əhəmiyyətli dərəcədə azalda bilərlər:
"Ön dizayndakı böyük və düz elementlərin heç bir funksional faydası yoxdur.Tədqiqatlar göstərir ki, kapotu 35 düymdən (89 sm) yüksək olan nəqliyyat vasitələri piyadalar üçün daha təhlükəlidir çünki onlar baş zədələrinə daha çox səbəb olurlar. Həm hündür, həm də kəskin xətləri olan avtomobillər sinə və omba üzərində buraxdıqları təsirlərə görə daha təhlükəlidir.
"Aydındır ki, nəqliyyat vasitələrinin ölçülərinin artırılması vətəndaşların həyatı bahasına başa gəlir" deyən Harkey, "Biz avtomobil istehsalçılarını xüsusilə SUV və pikap modellərinin dizaynını nəzərdən keçirməyə və yeni həllər tapmağa təşviq edirik".
Firuzə Əliyeva
