Uğurlu münasibətin SİRRİ: Qadınlar və kişilər nə istəyir?

“Yaxşı münasibətin sirri, düsturu, şifrəsi və hər kəsə uyğun formulu yoxdur”.

Sfera.az bildirir ki, bunu klinik psixoloq Fuad Əsədov deyib. Onun sözlərinə görə, bu, insandan insana, o cümlədən zaman və məkana görə dəyişir:

“Kişi və qadın təbiətini anlamaq lazımdır. Cinsiyyət fərqi özü ilə birlikdə bioloji və psixoloji olaraq başqa böyük fərqlər də yaradır. Cinslərin maraqları, güclü və zəif tərəfləri, gözləntiləri fərqlidir. Qadın diqqət, qayğı və yaxşı həyat təminatı istəyir. Yaxşı həyat təminatı isə sadəcə maddiyyat deyil. Qadın qarşısında gələcəyi parlaq, potensiallı bir kişi görmək istəyir. Xəyalı, məşğuliyyəti və konkret mövqeyi olmayan kişiyə bir qadının hörmət etməsi çətin məsələdir. Kişi isə qəhrəman, lider olmaq istəyir, buna görə də çərçivələrinə uyğunluq yarada biləcək bir qadın axtarışındadır. Kişinin təbiəti məsuliyyət almağa yönəlib”.

Psixoloq qeyd edib ki, keyfiyyətli münasibətdə kişi alfa, lider və maskulindir:

“Qadınla kobud və saymazyana danışmaq alfalıq deyil, bu zəiflikdir. Alfa kişi qadına qarşı nəzakətlidir və zorakılıq olmadan qadın ona hörmət edir. Lider olmaq idarəedici olmaq deyil. Yaxşı kişi qadınla məsləhət də edər, fikir də alar, hətta tabiri-caizsə, bir az çəkinər də. Amma alfa kişi təbiəti etibarilə izləniləcək, öndər seçiləcək bir insan olur. Təkcə qadınların gözündəki mövqe haqqında da danışmıram. Alfa kişi dostları və iş yoldaşları arasında da lider olur. Lider olmaq üçün nəsə etmir, avtomatik elə alınır. Ona görə də, alfalıq bir kişinin qalxa biləcəyi ən böyük zirvədir. Maskulin olmaq isə maço, sərt erkək demək deyil. Maskulin kişi həyatdan da, münasibətdən də nə istədiyini bilir və bunlar uğrunda mübarizə aparır”.

Mütəxəssisin sözlərinə görə, qadınlar çox vaxt kişini dəyişdirmək istəyirmiş kimi görünsə də, onlar prinsiplərinə sadiq kişiləri sevir:

“Çünki, qadın təbiəti feminen olmaq yönündə inkişaf edib. İstisnalar var, amma qaydanı pozmayacaq qədər. Qadının çata biləcəyi zirvə feminen olmaqdır. Zərafətli, ağıllı, fikir sahibi və özünü asılı vəziyyətə salmadan kompromisə gedə bilən.. Nəticədə, yaxşı münasibət üçün kişi və qadın təbiətini bilmək və buna uyğun davranmaq lazımdır”.

Türkan