Şəhid və qazi övladları "Möcüzələr Şəhəri"ndə - FOTOREPORTAJ
Bu gün Bakı Dövlət Sirki "Möcüzələr Şəhəri" adlı Beynəlxalq Su Sirki proqramı ilə yeni mövsümə start verib.
Sfera.az xəbər verir ki, proqram 13 oktyabr - 26 noyabr tarixləri müddətində valideyn himayəsindən məhrum, sağlamlıq imkanları məhdud, şəhid, qazi ailələrinin uşaqları üçün nümayiş olunacaq.
Bakı Dövlət Sirkinin direktoru Nahid Ağayev proqram haqqında məlumat verib:
“Hər il olduğu kimi bu il də yeni mövsümə şəhid və qazi ailələri üçün təşkil olunmuş tədbirlə başlayırıq. Çünki onların ölkəmizin ərazi bütövlüyünün təşəkkül tapmasında əvəzsiz rolları var. Bu tədbir hesabına biz onları sevindirə biliriksə, nə xoş bizə, bizim üçün çox böyük qürurdur.
Su Şousu çoxdan gözlənilən proqram idi. Burada sirk nömrələri ilə bərabər bu sahədə mövcud olmuş texniki yeniliklər sintez olunub. İlk dəfə olaraq 100 ton su illüziyası və 600 fontan simfoniyası ilə tamaşaçılar üçün təqdim olunur. Şou artistləri arasında dünya şöhrətli kloun, akrobatlar, gimnastlar, kəndirbazlar, ekvilibristlər də çıxış edirlər.
Proqramın süjet xətti var. Əvvəldən axıra kimi bir liman şəhərində baş verən hadisələrdən söhbət gedir. Hadisələri izləyən tamaşaçılar burada möcüzə və əyləncələrin şahidi olacaq”.
Firuzə Əliyeva
Fotolar: Anar Bayramlı
