"Google" süni intellekt tərəfindən yaradılan siyasi təbliğatda "bu şəkil real hadisələri əks etdirmir" və ya "bu video məzmunu sintetik olaraq yaradılıb" kimi etiketlərin daxil edilməsini tələb edəcək. Beləliklə, istifadəçilər yanlış məzmundan qoruna biləcəklər.

Sfera.az xarici KİV-ə istinadən xəbər verir ki, "Google" sözçüsü yeni qaydaların süni intellektlə məzmun yaradan vasitələrin yayılmasının qarşısını almaq üçün yaradıldığını bildirib.

Dəyişikliyin ABŞ-də növbəti prezident seçkilərinə qədər - noyabrda edilməsi planlaşdırılır.

"Google"un hazırkı reklam siyasəti artıq rəqəmsal media ilə siyasət , sosial məsələlər və ya ictimai maraq doğuran məsələlər haqqında insanları aldatmaq və ya çaşdırmaq üçün manipulyasiya etməyi qadağan edir.

Xatırladaq ki, mart ayında sosial şəbəkədə ABŞ-nin keçmiş Prezidenti Donald Trampın həbsini əks etdirən saxta foto paylaşılıb. Görüntü süni intellekt alətləri ilə yaradılıb.

Bundan başqa, mart ayında Ukrayna Prezidenti Volodimir Zelenskinin Rusiyaya təslim olmaqdan danışdığı saxta video da yayımlanmışdı.

Firuzə Əliyeva