Parlamentdə mumiyalanmış “yadplanetlilər”i nümayiş etdirdilər - VİDEO

Bu gün Meksika parlamentində keçirilən iclasda Peruda tapılan və yadplanetlilərə (UFO) aid olduğu iddia edilən iki cəsəd ictimaiyyətə nümayiş etdirilib. 

Sfera.az xəbər verir ki, şüşə qutuda iki kiçik “yadplanetli cəsədi” təqdim olunub.

Alimlərin qatıldığı tədbirdə “yadplanetlilərin” 1000 yaşında olduğu bildirilib. Meksika Avtonom Milli Universitetinin alimləri “yadplanetlilərin qalıqlarını” tədqiq etdiklərini və radiokarbon testlərinin aparıldığını açıqlayıblar. 

Açıqlama vermədən əvvəl and içən elm adamları, cəsədlərdə DNT testi etdiklərini və bu canlıların planetimizə aid olmadığını müəyyən etdiklərini söyləyiblər: “Biz onları mədənlərdə yerin altında tapdıq. Onları tapdıqda daşlaşmış vəziyyətdə idilər”.

Tədqiqatda iştirak edən UFO mütəxəssisi Jaime Maussan bu qalıqların Yer planetində yaşayan insanların təkamül prosesinin bir hissəsi olmadığını bildirib. Maussan daha əvvəl Peruda tapılan 5 mumiyanı analiz edib. Əllərində, ayaqlarında 3 barmağı olan mumiyaları "yadplanetlilər" adlandırıb. Lakin sonradan Maussanın iddiası təkzib edilib və mumiyaların uşağa aid olduğu bildirilib.

Tədbirdə Harvard Astronomiya Departamentinin direktoru professor Abraham Avi Loeb də videokonfrans vasitəsilə iştirak edib. O qeyd edib ki, Meksika hökuməti bu tapıntıları bütün elm adamlarına təqdim etməli və yadplanetlilərin mövcudluğu imkanları araşdırmalıdır.

Vasif