Çin hökuməti ölkənin xidmətlər sektorunda süni intelektin imkanlarından daha geniş və səmərəli şəkildə istifadə etməkdə qərarlıdır. Bu məqsədlə hökumət bütün məhsul qrupları üzrə milli texnologiyaların, proqramların tətbiqini gücləndirəcək.

Sfera.az CNN-ə istinadən xəbər verir ki, Çin ChatGPT (süni intelektə malik söhbət robotları (çatbot)) kimi populyar xidmətləri gücləndirən texnologiyanı tənzimləyən ilk ölkələrdən biri olmaqla generativ süni intellekt (AI) üçün yeni qaydalar qəbul edib. Çinin Kiberməkan İdarəsi bir sıra yenilənmiş qaydaları açıqlayıb. Yeni qaydalar avqustun 15-dən qüvvəyə minəcək.

Yeni qaydalar internet üzərindən xidmət göstərən şirkətləri süni intellekt çatbotlarının (chatbot) öz versiyalarını işə salmağı həvəsləndirəcək. Məlumatlara görə artıq Alibaba (BABA), Baidu (BIDU) və JD.com (JD) kimi nəhənglər süni intellekt çatbotlarının öz versiyalarını işə salmağa yaxındırlar. 

Qaydalar hələlik Çində geniş ictimaiyyətə açıq olan xidmətlərə şamil ediləcək. Tədqiqat müəssisələrində inkişaf etdirilən və ya xaricdəki istifadəçilər üçün nəzərdə tutulan texnologiya istisna olunur. 

Yeni qaydalarla dövlətin bütün sənaye və xidmət sahələrində AI-dən istifadə təşviq ediləcək. Bunun üçün təhlükəsiz və etibarlı çiplərin, proqram təminatının, alətlərin, hesablama gücü və məlumat mənbələrinin inkişafı dəstəklənəcək. 

Qeyd edək ki, xidmət sektorunda süni intelektə əsaslanan çatbotlardan istifadə edilməsi son aylarda populyarlıq qazanıb. İndi Çinin texnologiya şirkətləri çatbotların öz versiyalarını buraxmaq üçün yarışırlar. 

Çin bu sahəni inkişaf etdirməklə dünyada liderliyə sahib olmaq istəyir. Çinin bu sahədə əsas rəqibi isə ABŞ-dir. ABŞ senatoru Mark Varner keçən ay xəbərdarlıq etmişdi ki, süni intellekt texnologiyasının tətbiqində Çin əhəmiyyətli irəliləyişlər əldə edib. 

Vasif