Öz üzərində cərrahi əməliyyat aparan həkim - Roqozov 53 il əvvəl tibb tarixinə adını necə yazdırdı?
Leonid Roqozov öz üzərində ən ağır şəraitdə cərrahi əməliyyat aparan həkimlərdən biri kimi tarixdə qalıb.
Sfera.az xəbər verir ki, SSRİ-nin və Rusiyanın tanınmış həkim-cərrahı Roqozov bu çətin əməliyyatı Antarktidada həyata keçirib.
Leonid Roqozov 1959-cu ildə tibb institutunu bitirib və dərhal cərrahiyyə üzrə aspiranturaya daxil olub. O, aspiranturanı başa çatdırmamış 1960-cı il noyabrın 5-də 6-cı Sovet Antarktika Ekspedisiyasının həkimi kimi Antarktidaya gedir. Tezliklə Antarktidada 27 yaşlı cərrahı bütün dünyada məşhur edən bir hadisə baş verir.
29 aprel 1961-ci ildə Leonid özündə narahatedici simptomlar aşkar edir. O, bədənində zəiflik, ürəkbulanma, qızdırma və sağ tərəfində ağrı hiss edir. Antarktikaya gedən 13 nəfərdən ibarət ekspedisiyanın yeganə həkimi olan Leonid özünə kəskin appendisit diaqnozu qoyur.
Leonid ilk variant kimi mühafizəkar müalicə taktikasını seçir. İstirahət edir, ac qalır, antibiotiklərdən istifadə edir. Amma bu üsullar həkimə kəskin xəstəlikdən xilas olmağa imkan vermir. Ertəsi gün həkimin temperaturu daha da yüksəlir.
Həmin dövrdə SSRİ-nin Novolazarevskaya stansiyasında kiçik xəstəxana yerləşirdi. Bu stansiya Leonidin məskunlaşdığı yerdən 80 km aralıda idi. Lakin hava şəraiti və təyyarənin olmaması kəskin appendisitdən əziyyət çəkən həkimi stansiyaya çatdırmağa imkan vermirdi.
Yaranmış vəziyyətdə yeganə çıxış yolu Leonidin öz üzərində cərrahi əməliyyat aparması idi.
Leonid meteoroloq və mühəndisin köməyi ilə 1961-ci il aprelin 30-na keçən gecə öz üzərində cərrahi əməliyyat aparmalı olur. Əməliyyat zamanı əsas vasitələr kiçik dairəvi güzgü və stolüstü lampa idi.
Özünə lokal anesteziya etmiş Leonid lampanın işığında, güzgüyə baxmaqla iltihablı appendiksi çıxarıb, qarın boşluğunu təmizləyib əməliyyatı başa çatdıra bilir. Gecə yarısına yaxın 1 saat 45 dəqiqə davam edən əməliyyat uğurla yekunlaşır. Beş gündən sonra həkimdə hərarət normallaşır və o iki gündən sonra tikişlərini sökür.
Leonidin cəsarətli əməliyyatı tibb elmində onun nüfuzunu artırdı və bu hadisə bir həkimin qəhrəmanlığı kimi xarakterizə olundu.
Vasif
