Bayramdan sonra əsas problem: İşə necə adaptasiya olaq? - ÜSULLAR
Bayram günlərindən sonra əksər insanlarda işə adaptasiya ilə bağlı problemlər yaranır. Belə ki, tətil günləri daha gec oyanmağı, dincəlməyi 9-10 saatlıq iş rejimi əvəzləyir. Bu isə öz növbəsində tətil sonrası ilk günlər gərginlik yaradır.
Maraqlıdır, bayram sonrası işə tez bir zamanda adaptasiya olmağın hansısa üsulu varmı?
Məsələ ilə bağlı Sfera.az-a açıqlama verən psixoloq Aytən Ələkbərova adaptasiya məsələsinin fərdi olduğunu deyib:
"İnsan orqanizmi bioloji elmlər, şəxsiyyət anlayışı, sosial elmlər konteksində formalaşır. Bunun üçün təbiidir ki, hər fərdin özünəməxsus bioloji xüsusiyyəti olduğu kimi, adaptasiya növləri də olur. Yəni burada insanın adaptasiya olunması fərdin düşüncəsindən və qarşısına qoyduğu planlardan asılı olur. Bu məsələdə artıq emosiya və hisslər özünü göstərməyə başlayır. Bayram günləri işin özəlliyi üçün darıxan tiplər də olur. Məsələn, biz şagirdlərdə də görürük ki, tətil günlərinin sonuna yaxın ilk növbədə rəngli boyaların üzərinə qaçırlar, çantalarına ilk yığmaq istədiyi əşya məhz bu olur. Çünki rənglər dünyası uşaqların özündə yaratdığı adaptasiya növüdür".
Psixoloq böyüklər üçün işə adaptasiya olmağın bir neçə üsulu barədə də danışıb:
"Böyüklərdə isə adaptasiya fərqli formada ola bilər. Yaxşı olardı ki, biz bu vaxtlarda fəsil dəyişkənliyinin müsbət tərəflərinə meyl edək. Məsələn, yeni libas almaq üçün alış-veriş edə bilərik. Yaxud da bayram müddətində çəkdiyimiz fotolara baxıb fototerapiya ilə məşğul olmaq və istirahəti mükəmməl keçirməyin qənaətinə gəlmək ən gözəl adaptasiya növüdür".
Əzizə Zeynal
