Divarların arxasını görə bilən dron HAZIRLANDI

Kanadalı tədqiqatçılar simsiz internet bağlantısı (Wi-Fi) əsasında "divarların arxasını görə bilən" dron hazırlayıblar.

Sfera.az xarici KİV-ə istinadən xəbər verir ki, Ontario əyalətindəki Vaterloo Universitetinin tədqiqat qrupu 20 dollarlıq hazır pilotsuz uçan aparata yeni proqram təminatı əlavə edib.

Belə ki, evlərdə Wi-Fi-a qoşulmuş bütün cihazların yerini xəritəyə çıxara bilən hava skan aləti hazırlanıb. "Wi-Peep" adlanan alət simsiz internet şəbəkələrindəki məlumatları manipulyasiya və sözügedən cihazların yerini təxmini olaraq təyin edə bilər.

Dronda quraşdırılan haker proqramı "uçuş vaxtı" (ToF) adlı texnikadan istifadə edir. Bu texnika siqnal və obyekt arasındakı fiziki məsafəni ölçmək üçün bir növ manipulyasiya hiyləsindən istifadə edir. Bütün bunlar simsiz internet bağlantısı olan əksər cihazlarda mövcud olan təhlükəsizliyin zəifliyi sayəsində mümkün olur. Çünki ağıllı qurğular parolla qorunsa belə, ərazidəki digər cihazlardan gələn “əlaqə cəhdlərinə” avtomatik cavab verir. Bu zəifliyi manipulyasiya etmək üçün "Wi-Peep" evin daxilindəki cihazlarla əlaqə saxlamağa çalışan ToF siqnalı verir. Tədqiqatçılar "Wi-Peep" kimi texnologiyanın istifadə oluna biləcəyi qorxulu ssenarilərdən narahatdırlar.

Müvafiq olaraq, sözügedən cihazdan istifadə edən haker ağıllı saatlar və telefonlar vasitəsilə ev sakinlərinin yerini müəyyən edə, həmçinin təhlükəsizlik kameralarının və hətta müdaxilə sensorlarının harada olduğunu anlaya bilər. Bu, həmçinin evdə sakinlər olmadığı zaman oğruya kompüter kimi qiymətli əşyaları asanlıqla tapmağa imkan verə bilər.

İnci,

Sfera.az