Azərbaycanda “iPhone” almaq üçün neçə gün işləmək lazımdır? - STATİSTİKA
“Picodi” ekspertləri növbəti "iPhone indeksi 2022"ni dərc ediblər. Onlar “iPhone 14 Pro” (128Gb) smartfonun ölkələr üzrə mövcud qiymətini və aylıq orta əmək haqqını müqayisə ediblər.
Sfera.az bildirir ki, bu barədə Azərbaycan İnternet Forumunun rəhbəri Osman Gündüz məlumat verib.
O qeyd edib ki, bu müqayisəyə görə orta statistik azərbaycanlı “iPhone” almaq üçün 83 gün işləməlidir:
“Adı çəkilən qurumun statistikasına görə, Azərbaycanla bağlı vəziyyət ötən illə müqayisədə müsbətə doğru 10 gün dəyişib. Ən yaxşı vəziyyət İsveçrədədir. Burada 4-5 gün işləmək kifayətdir ki, bir “iPhone” alasan. Bu indeksə görə, orta statistik amerikalı bir “iPhone” almaq üçün 5-6 gün sərf etməlidir. Tacikistanda isə bunun üçün təxminən yarım il, Gürcüstanda 64 gün lazımdır”.
Ekspert bildirib ki, keçmiş sovetlər birliyində ən yaxşı vəziyyət Estoniyadadır:
“Bu ölkədə 21 gün işləyib bir “iPhone” almaq olar. Qurumun ekspertləri “iPhone” indeksini hazırlayarkən bu telefonun mağazalardakı rəsmi satış qiymətlərini və statistika qurumlarından əldə olunan aylıq orta əmək haqqı göstəricilərini müqayisə ediblər. Qeyd edim ki, 2018-ci ildən başlayaraq belə indeks dərc olunur”.
Günay Rəsulqızı,
Sfera.az
