Süni intellektlə 500 mindən çox izləyici qazandılar

Yeni rok qrupu “The Velvet Sundown” cəmi iki həftə ərzində “Spotify”da 500 mindən çox aylıq dinləyici qazanıb və bir ayda iki albom buraxıb. 

Sfera.az xarici KİV-ə istinadən xəbər verir ki, üçüncü albomları “Paper Sun Rebellion” isə iyulun 14-də çıxacaq. Lakin qrupun süni intellekt tərəfindən yaradıldığı iddiaları sosial mediada geniş yayılıb. “Twitter” istifadəçiləri bildirir ki, qrupun sosial media görüntüləri AI ilə hazırlanıb və qrup üzvləri kimi təqdim edilən şəxslər haqda internetdə heç bir məlumat yoxdur. Sosial şəbəkə hesabları da yalnız 27 iyunda yaradılıb.

“Spotify”da “70-ci illərin alternativ və folk rok qrupu” kimi təqdim olunan “The Velvet Sundown”un “Dust on the Wind” adlı mahnısı 500 minə yaxın dinlənib. Qrupun musiqiləri “Apple Music”, “Amazon Music” və “Deezer”kimi platformalarda da yer alır. “Deezer”bəzi treklər üçün “süni intellektlə yaradılmış ola bilər” xəbərdarlığı əlavə edib.

Süni intellektlə yaradılan musiqi sənayeni dəyişir. Keçmişdə “Spotify”ın “xəyal sənətçilər”dən istifadə etdiyi iddia olunub və araşdırmalara görə, musiqi istehsalçıları 2028-ci ilə qədər gəlirlərinin 24%-ni itirə bilər. Buna baxmayaraq, “Grimes”, “Björn Ulvaeus” və “Timbaland” kimi sənətçilər süni intellektlə işləməyə açıq yanaşır və bu texnologiyanı yaradıcı alət kimi qəbul edirlər.

Fidan Hacızadə
Sfera.az