Acun Ilıcalıdan haqqındakı ittihamlarla bağlı açıqlama

Türkiyənin İstanbul şəhərində qanunsuz mərc oyunları ilə bağlı aparılan araşdırmalar çərçivəsində barəsində 5 il 3 ay həbs cəzası tələb olunan iş adamı Acun Ilıcalı ittihamlarla bağlı açıqlama edib.

Sfera.az xəbər verir ki, Acun TV proqramlarının birində bu məsələyə münasibət bildirib.

İlıcalı özünün günahsız olduğunu vurğulayıb:

"Xaricdən aldığım oyunları yayımlayanda stadionda reklamlar olur. Ancaq hər yerdə başlıqlarda mənim adım çəkilir! Mən nə etmişəm ki? Milli matçı yayımladım, stadionda qeyri-qanuni reklam var, mən nə edə bilərdim ki?

Sadəcə olaraq xaricdən matçı almışam heç bir müdaxiləm olmayıb. Aydın şəkildə soruşmaq istəyirəm: Niyə bu mövzularda danışılmır? Görünür, müəyyən bir qrup məni hədəf alıb və məsələ məhkəməyə qədər gəlib. Amma məhkəmənin olması həmin hadisənin cinayət olduğunu sübut etmir. Hətta hələ qərar verilməyib.

Mənə irəli sürülən ittiham yayımlayıcı olaraq bu görüntüləri göstərməyimdir. Xaricdən alındığı üçün eyni vəziyyəti yaşayan 5-6 televiziya kanalı var. Hamımız eyni çətinliklərlə üzləşirik. Bu reklamlar avtomatik olaraq keçir, bizim müdaxiləmiz mümkün deyil. Mənim müdafiəm də məhz bu prinsiplədir.

Məni mərc oyunları ilə əlaqələndirməyə çalışmaq tamamilə başqa bir məqsəddir. Böhtanların atılacağını gözləyirdim, amma məni mərc məsələsi ilə əlaqələndirmək absurd bir şeydir. Mən UEFA-dan matç almışam. Burada mənim edə biləcəyim heç bir şey yoxdur. Buna görə də ədalətə inanmaqdayam.

Mənim üçün heç bir problem yoxdur, çünki ortada başqa heç bir şey yoxdur. Əgər desələr ki, mərc şirkəti ilə müqavilə bağlayıb, pulun yarısını almışam - buyurun, buradayam. Amma belə bir şeyin sübut edilməsi mümkün deyil, çünki belə bir şey baş verməyib."

Xatırladaq ki, ittiham aktında "TV8" və EXXEN platformalarında yayımlanan futbol matçları zamanı qanunsuz mərc saytlarının reklam edildiyi bildirilir. İşlə bağlı ümumilikdə səkkiz nəfər təqsirləndirilir. Acun Ilıcalı iyul ayında məhkəməyə çıxacaq.