Alim Qasımovun türkiyəli sənətçi ilə konserti anşlaqla qarşılandı - FOTOLAR

Dekabrın 6-da Heydər Əliyev Mərkəzində “Ruhların dilə gəlməsi” adlı konsert baş tutub.

Sfera.az bildirir ki, Azərbaycan Xalq artisti, xanəndə Alim Qasımov Türkiyənin məşhur sənətçisi Cenk Erdoğanla birlikdə möhtəşəm gecəyə imza atıb. Burada Alim Qasımovun muğam ifası ilə Cenk Erdoğanın müasir tərzdə gitara ifası birləşərək, ənənəvi və müasir musiqi janrlarının sintezini yaradıb.

Onların performansı musiqi və hisslərin bir dialoqu kimi təqdim olunub, sanki ruhlar musiqi vasitəsilə bir-birinə dil açıb.

Tədbirdə Alim Qasımov, həmçinin qızı Fərqanə Qasımova ilə birlikdə ifa edib. Cenk Erdoğan isə uzun müddətdir, Azərbaycana gəlmək istədiyini, buradakı ilk konserti olduğunu vurğulayıb. O, həmçinin Alim Qasımova heyranlığını da ifadə edib. 

Ümumilikdə, sənətçilərin çıxışı anşlaqla qarşılanıb. Bunlarla yanaşı, xanəndə tamaşaçılarla da səmimi söhbətlər edib. 

Sözügedən konsertdən fotoları təqdim edirik:

Günay