“Louis Vuitton”dan “Versace”ə qədər ən dəbdəbəli brendlər Ramazan ayı üçün xüsusi kolleksiyalar buraxaraq Yaxın Şərq bazarını hədəfləyir.

Sfera.az xəbər verir ki, dəbdəbəli brendlər bu il Ramazan kolleksiyalarında əl çantaları, ayaqqabılar, gün eynəkləri və sadə pastel rəngli, çiçək naxışlı paltarları təqdim ediblər.

Vəziyyətə diqqət çəkən “Cosmopolitan” moda jurnalının Yaxın Şərq versiyası bu ayki sayında "İftar və sahurda ən yaxşı geyinən siz olun" başlığından istifadə edib.
Bildirilib ki, Avropa iqtisadiyyatı Ukrayna müharibəsinin yaratdığı mənfiliklərdən təsirlənsə də, brendlər Yaxın Şərq bazarında böyüyərək gəlirlərini artırmağı hədəfləyirlər.

Jurnal yazır ki, Dubaydakı “Mall of Emirates”də alış-veriş edənlər də artıq lüks brendlərin İslam mədəniyyətinə daha çox diqqət ayırdığını təsdiqləyirlər:

“Lüks brendlər indi bizim mədəniyyətimiz və dinimiz haqqında daha çox məlumatlıdırlar. Onların vitrinlərində Ramazan ayı və Ramazan bayramı ilə bağlı kolleksiyalar tapmaq olur”.

Lalə
Sfera.az