Şahzadə Harri ilə birgə çəkildiyi sənədli filmdən sonra əvvəlki populyarlığını itirən Meqan Markl özünün “The Tig” adlı bloqunu yenidən aktivləşdirmək qərarına gəlib. 

Sfera.az xəbər verir ki, bu barədə “Telegraph”ın jurnalisti Seliya Uolden tənqidi yazı qələmə alıb. O, düşesin həyat tərzi “guru”su olmaq istədiyini qeyd edərək “problem ondadır ki, heç kim onun məsləhətini istəmir”, deyə vurğulayıb.

Jurnalistin fikrincə bu bloq məsələn, Qvinet Peltrounun “Goop” kimi markalarını narahat edəcək gücə malik deyil. 

Yazıda deyilir ki, ABŞ Ticarət Nişanı və Patent İdarəsinə təqdim edilən sənədlər 2017-ci ildə 41 yaşlı şəxs tərəfindən bağlanan vebsaytın gələn həftə geri qayıda biləcəyini göstərir. Meqan Qvinet Peltrounun 200 milyon funt-sterlinqlik təyat tərzi brendi “Goop”la ayaqlaşmaq istəyir. 

“Markl Şahzadə Harri ilə nişanlananda üç yaşlı bloqu ilə vidalaşdı. Onun moda, səyahət, gözəllik məsləhətlərindən asılı olanlara zərbə vurdu. Onun reseptləri olmadan necə salat hazırlamaq olar? Xoşbəxtlikdən, altı ildir çəkdiyimiz mənəvi əzab sona çatır”, deyə jurnalist ironiya ilə qeyd edib. 

O, veb saytın adının Marklın sevimli Toskana şərabı Tignanellodan gəldiyini də vurğulayıb.

Jurnalist tənqidi yazısına belə davam edib:

“Şübhəsiz ki, Markl şahzadələrin həyatına uyğunlaşa bilmədi. O, Opra Uinfrinin verilişinə çıxmağın nə qədər pis nəticələnəcəyini, altı saatlıq Netflix sənədli filminin sosial, iqtisadi çağırışlarla dolu post-pandemiya dünyasına necə səslənəcəyini dərk edə bilmədi. 

Ötən ay “Newsweek” Sassekslərin populyarlığının ABŞ-da bütün zamanların ən aşağı səviyyəsinə düşdüyünü, Şahzadə Harrinin dekabr ayından bəri 48 bal, Marklın isə 40 bal itirdiyini açıqladı. Ancaq Markl belə bir anda "Tig"lə geri qayıtmaq fikrinə düşə bilər. Onun alçaq kürsüdən məsləhətlər vermək arzusu, şübhəsiz ki, mükəmməl özünə inamı göstərir.

Çünki Qvinet Peltrou ilə bağlı bir reallıq var: siz onun 15 000 dollarlıq vibratorları və “sərfəli yaxta icarəsi” xidmətlərini istədiyiniz qədər lağa qoya bilərsiniz, onun “səkkiz günlük mono-dietli keçi südü ilə təmizlənmə” və “vaginanın buxarlanması” prosedurlarının arxasındakı elmi sorğulaya, cadugərlik adlandıra bilərsiniz. Lakin “Goop”un 8 milyondan çox abunəçisinin nəzərində o, 50 yaşlı Oskar mükafatlı, həyatı ilhamverici olan biridir. Hər bir “uğurlu qadının həyat tərzi” brendinin arxasında birbaşa paxıllıq elmi dayanır.

Bu, olmasaydı, Riz Uizerspun 400 milyon dollar dəyərində həyat tərzi markası qura bilməzdi. Keyt Hadsonun təxminən 100 milyon dollar dəyərində biznes portfeli (fitnes geyimləri və qida əlavələri ilə bağlı) olmazdı və Cessika Bil 550 milyon dollarlıq sağlamlıq imperiyasını yarada bilməzdi.

Mişel Obamanın kitablarının dünyada nəşr rekordları qırmağa davam etməsinin səbəbi də eynidir - “Mən onun həyatını istəyirəm” aurasını əks etdirir.

Bir illüziya olub-olmamasından asılı olmayaraq, bu qadınların davranışlarında onları bir postamentə qoymağı asanlaşdıran klassika var. Yaxşı, bəs Marklın həyatını neçə qadın istəyir? Şəxsən mən onun həyatına sahib olmaq istəyən bir qadın tanımıram. Çünki tanıdığım qadınlar kin saxlamırlar. Kədərli hekayələrə yaslanmaq onların arzuladığı həyat deyil. 

Açıq desək, Sassekslərin "azadlıq tapmaq" və "daxili sülh" söhbətləri dəlilsizdir. Axı, narazı hersoginya hələ də əri ilə Kraliçanın onlara hədiyyə etdiyi acınacaqlı "kiçik" kottecdə dözməli olduqları mübarizələrdən; daha vacib olan kral ailəsinə kölgə salmamaq üçün rəngli paltarlar geyinməyinin qadağan olunması ilə bağlı ağrılı xatirələrindən bəhs edir. 

Həm Obama, həm də Peltrou yaşadıqları çətinliklərdən danışıblar. Keçmiş birinci xanım Ağ Evdəki müddətin onun üçün nə qədər çətin olduğunu açıqlayıb; “Goop”un qurucusu evliliyinin dağılması haqqında səmimi danışıb. Bununla belə, hər iki halda açıqlamalar yüksək notlarla başa vurulub: çıxarılan nəticə, alınan dərslərlə… “Bundan ən yaxşı şəkildə necə yararlandın?” sualına aydın cavab veriblər. 

Seliya Uolden yazısını yekunlaşdırarkən tənqidin dozasını daha da artırıb:

“Rəsmi ABŞ Ticarət Nişanı və Patent İdarəsi sənədlərində yenidən aktivləşəcəyi bildirilən “Tig”lə bağlı bir qeyd var: "şəxsi münasibətlər sahəsində şərhlər ola bilər". Əzabların qadını Meqan bizə sağlam şəxsi münasibətləri necə qurmalı olduğumuz barədə mühazirə oxuyacaq? Uğurlar”.

Lalə
Sfera.az