5 yaşlı uşağını boğaraq öldürməkdə təqsirləndirilən qadının cinayət əməli barədə məlumat vermişdik.

Sfera.az musavat.com-a istinadən xəbər verir ki, Bakı Ağır Cinayətlər Məhkəməsində qətli törətməkdə təqsirləndirilən Nazilə Qulubəyovanın cinayət işi üzrə məhkəmə prosesi hakim Novruz Kərimovun sədrliyi ilə davam etdirilir.

1983-cü il təvəllüdlü Nazilə Qulubəyova Bakıda dini təriqətlərdən birinin üzvü olub. O, 5 yaşlı oğlu Fərid Quluzadəni boğaraq qətlə yetirib. Hadisə paytaxtın Yasamal rayonu D.Bünyadzadə küçəsi ev 15 ünvanındakı mənzillərdən birində baş verib.

Araşdırma zamanı məlum olub ki, uşağın anası xristian yönümlü "Üzüm bağı" təriqətinin üzvü imiş.

Sonuncu məhkəmə prosesində hadisənin təfərrüatı haqda ətraflı ifadə verməyən N.Qulubəyovanın həbs edilən zaman istintaqa dedikləri məlum olub.

Əldə etdiyimiz məlumata görə, Qulubəyova törətdiyi əməli və qoşulduğu dini cərəyanla bağlılığını ətraflı şəkildə danışıb.
Əvvəlcə qeyd edək ki, istintaqla müəyyən edilib ki, Nazilə Qulubəyova əziyyət çəkdiyi imperativ xarakterli görmə və eşitmə hallüsinasiyaları növündə ruhi xəstəliyi ilə əlaqədar anlaqsız vəziyyətdə olaraq azyaşlı oğlu Fərid Qulibəyovu bədənindən ehtimal etdiyi pislikləri çıxartmaq niyyəti ilə onun əllərini arxadan ağ rəngli uşaq poliveri ilə, ayaqlarını isə köynəklə tutaraq tənəffüs yollarını əllə qapadıb. Yaranmış mexaniki asfiksiya nəticəsində köməksiz vəziyyətdə olan azyaşlı hadisə zamanı dünyasını dəyişib.

İstintaq zamanı Nazilə Qulubəyova ona elan olunmuş ittihamla özünü təqsirli bilib. Məhkəmədə isə, nəyə görə həbs edilməsindən xəbərsiz olduğunu demişdi. O, qeyri-ixtiyari hərəkətlər edirdi.

N.Qulubəyova istintaqdakı ifadəsində göstərib ki, həyat yoldaşı və oğlu ilə bir yerdə yaşayıb. Həyat yoldaşı Heydər Əliyev adına hava limanında işləyib, özü isə evdar qadın olub.

Həyat yoldaşı ilə münasibətləri əvvəllər yaxşı olsa da son illər qayınanası Nataliyaya görə aralarında münasibətlər pozulub. Onun sözlərinə görə, əri ilə problemlər yaşayarkən o, anasının tərəfini tuturmuş.

N.Qulubəyova bildirib ki, tez-tez aralarında mübahisə olsa da, əri heç vaxt onu vurmayıb və korluq çəkmələrinə qoymayıb.

O, dinə marağı haqda da istintaqın suallarını cavablandırıb.

Qulubəyova ifadəsində gənc yaşlarında dinə maraq göstərdiyini, sosial şəbəkələrdə dini təriqətlərlə maraqlandığını, videoçarxlara baxdığını, əvvəl İslam dininə maraq göstərsə də, sonradan İsa peyğəmbərin təriqəti ilə maraqlanmağa başladığını deyib.

O, əri Rüfət Qulubəyovun dostu Eminin arvadı Sima ilə görüşdükdən sonra bu dinə marağının yarandığını bildirib.

"Dedi ki, gəl səni özümlə bir yığıncağa aparım. Orada insanlar bir yerə toplaşır, İsa peyğəmbərə sitayiş edir, rahatçılıq tapırmışlar. Əvvəlcə istədim gedəm, amma Rüstəm qoymadı. Sonra sosial şəbəkədə video-çarxa baxdım. Sonra qərara gəldim ki, o yığıncaqda iştirak edim. 2016-cı ilin 9 oktyabrında səhər saatlarında Sima ilə bilrlikdə onun avtomobili ilə Gənclik metrostansiyası yaxınlığında yerləşən bir ofisə gəldik. Yığıncaqda 30 nəfərə yaxın insan var idi. Oraya yığılanların mahnı oxuduqlarını və İsa peyğəmbəri çağırdıqlarını gördüm".

Onun sözlərinə görə rəfiqəsi Simagilin oxuduğunu görüb özü də həmin sözləri təkrar etməyə başlayıb.

"İsa peyğəmbərin işıqlı simasını gördüm. Titrəməyə başladım. Sima dedi ki, narahat olma, səni İsa seçdi, ona görə belə hala düşdün. Hiss etdim ki, İsa peyğəmbərin mənə deyəcək sözü var. Həmin sözü həm Eminə, həm də oradakı şəxslərə çatdırmalıyam. Eminə dedim ki, İsanın sənə sözü var, o isə mənə qulaq asmadı”.

Qulubəyova əlavə edib ki, həmin ofisdə ona bir şüşə çaxıra bənzər maye və çörək veriblər və deyiblər ki, bu İsanın qanıdır. O, da həmin mayeni içib. Bundan sonra daha da titrəməyə başlayıb.

"Bir nəfər əlində kisə oradakılardan pul yığırdı. Mən də kisəyə pul atdım. Pulu niyə yığdıqlarını bilmirdim. Təxminən günorta saatlarında yığıncaqdan çıxıb evə gəldim. Orada iştirak etməyimdən ərimin xəbəri oldu. Bir daha oraya getməyi mənə qadağan etdi. Evdə internetdə Bibliyaya qulaq asırdım. Qulağıma səslər gəlirdi. İsa mənə dünyanı dəyişmək və pislikləri məhv etmək istədiyini deyirdi. Bununla bağlı Simaya və onun bacısına da dedim. Onlar "biz də İsanı görmüşük, yaxınlarda dünya dəyişəcək" deyirdilər. Həmin gündən sonra mütəmadi olaraq qulağıma səslər gəlirdi. Bu səslər mənə "Kitabı oxu” əmri verirdi. Kitabı oxuduqca İsa peyğəmbərin şeytanları öldürdüyünü görürdüm. Hadisə baş verən gün səhər tezdən yuxudan oyandım. Həyat yoldaşım sübh tezdən işə getdi. Oğlum isə xəstə olduğu üçün bağçaya getməmişdi. Təxminən saat 18 radələrində kitab oxuyarkən İsa peyğəmbəri gördüm. Mənə dedi ki, oğlunun ağzına ağ rəngli köynəklə tut ki, içərisində olan pisliklər çıxsın. Həmçinin uşağın əlini və ayaqlarını ağ rəngli köynəklə bağlamağımı əmr etdi. Onun dediklərini etdim. Əllərini və ayaqlarını "sviter"lə bağladım. Fərid çabalasa da İsa dedi ki, ağzını buraxma, qoy içərisində olan pisliklər tam çıxsın. Mən də uşağın çabalamasına baxmayaraq ağzından möhkəm tutdum, bir əlimlə isə telefonda dualar oxudum. Uşağın halının pisləşdiyini hiss edirdim, amma İsa uşağı buraxmağıma icazə vermirdi. Fəridə baxdıqca onun simasında şeytan görürdüm. İsa deyirdi ki, sən oxu, mən onu geri qaytaracam.

Təxminən 20 dəqiqə uşağın ağzını tutduqdan sonra onun öldüyünü gördüm. Tez Simaya və Tahirəyə uşağın ölməsiylə bağlı mesaj yazdım. Onlar "darıxma, ölməyib, İsa onu geri qaytaracaq” dedilər. İsa isə deyirdi ki, fikrini yayındırma, ona görə də evin qapısı döyülsə də açmırdım. Daha sonra mənə dedi ki, uşağın əlini-qolunu bağladığın paltarları qara torbaya qoy, balkonda gizlət. Mən də onun dediklərini yerinə yetirdim. Uşağın oyuncaqlarını da balkonda gizlətdim. Bir qədər sonra qapı açıldı, içəri polis əməkdaşları, həyat yoldaşım girdi. Mən uşağı öldürmək istəmirdim, təsir altına düşmüşdüm. Özümü çox pis hiss etdim. İsa mənə dedi ki, uşağı boğ, onun canından pisliklər çıxsın. Heç vaxt psixi xəstəliyim olmayıb, xəstəxanada müalicə almamışam. Hadisə zamanı oğlumdan və özümdən başqa evdə heç kim olmayıb"- N.Qulubəyova dəhşətli cinayətin təfərrüatlarını danışarkən deyib.

5 yaşlı oğlunu öldürən anadan ŞOK açıqlamalar: "Fərid çabalasa da..."