"2025-ci ilin birinci yarımilində cinayətlər 10,9% azalıb" - Hərbi prokuror
2024-cü ilin birinci yarımili ilə müqayisədə, 2025-ci ilin birinci yarımilində qeydə alınan hərbi xidmətdən yayınma cinayətləri ümumilikdə 43,9% azalıb.
Sfera.az xəbər verir ki, bu sözləri Hərbi prokuror Bəhruz Əhmədov Hərbi Prokurorluqda keçirilən geniş Kollegiya iclasında bildirib.
Hərbi prokuror qeyd edib ki, bu ilin birinci yarımilində hərbi xidmət vəzifələrinin icrasından boyun qaçırma cinayətləri 36,4 %, hərbi hissəni və ya xidmət yerini özbaşına tərk etmə cinayətləri 45,3%, fərarilik cinayətləri 70 % azalıb.
B.Əhmədov bildirib ki, bu ilin ilk yarısında vəzifə səlahiyyətlərindən sui-istifadə və ya vəzifə səlahiyyətlərini aşma cinayətləri 52,9%, yol hərəkəti və nəqliyyat vasitələrinin istismarı qaydalarını pozma cinayətləri 18,2%, özünü öldürmə həddinə çatdırma cinayətləri isə 50% azalıb.
Hərbi prokuror söyləyib ki, ümumilikdə, 2025-ci ilin birinci yarımilində qeydə alınan cinayətlər üzrə ötən ilin birinci yarımili ilə müqayisədə 10,9%, qeyri-hərbi cinayətlər 2,5%, hərbi xidmət əleyhinə olan cinayətlərdə isə 18,6% azalma baş verib:
"Cinayət işlərinin başlanmasının qanuniliyinə və əsaslılığına xüsusi diqqət yetirilməsi, icraatda olan işlər üzrə bütün halların hərtərəfli, tam və obyektiv araşdırılması istiqamətində həyata keçirilmiş fəaliyyət, düzgün qurulmuş istintaq metodikası və taktikası, səriştəli aparılan istintaq hərəkətləri, tələb edilən səviyyədə prosessual rəhbərlik, eləcə də işçilərin peşəkarlığı və əzmi sayəsində qeydə alınan cinayətlərin ümumilikdə 99,2 faizi açılıb. 2025-ci ilin birinci yarımilində qəsdən adam öldürmə və qəsdən sağlamlığa ağır zərər vurma cinayətləri qeydə alınmayıb".
Altay
