Məhkəmələrin mülki, iqtisadi və inzibati işlər üzrə qərarlarının, hökmlərinin, eləcə də məhkəmə əmrlərinin icrasına məsul olan Ədliyyə Nazirliyinin icra qurumlarından son vaxtlar şikayətlərin ardı-arası kəsilmir. Bu şikayətlər əsasən icra qurumlarının vəzifə səlahiyyətlərini aşması, qanunla üzərilərinə qoyulan vəzifə öhdəliklərini icra etməməsi, yüksək vəzifəli şəxslərin şəxsi əlaqələrindən istifadə edərək qərarların icrasını ləngitməsi və ya ümumiyyətlə icra olunmaması ilə bağlıdır.

Sfera.az saytının redaksiyasına daxil olan şikayətlərdən birində bu qəbildən olan hallarla bağlı narazılıq ifadə edilir.

Saytımıza ünvanlanan şikayətdə bildirilir ki, nazirliyin icra qurumları qanunlara deyil, “sifarişə” əsaslanan qərarlar qəbul edir.

İddiaya görə, bu tip qərarların qəbulunda hətta ədliyyə nazirində müdaxiləsini olması da görünür.

Hadisənin təfərrüatı

Redaksiyamıza müraciət edən şikayətçi Dilarə Bağırova 2019‑cu ildə Samirə Məmmədova (ad şərtidir - red.) tərəfindən təhqir edilməsi ilə bağlı xüsusi ittiham qaydasında Səbail Rayon Məhkəməsinə müraciət edib. Bağırova sonradan Samirə Məmmədovanı bağışlayıb. Buna səbəb Samirə Məmmədovanın dünyasını dəyişməsidir.

Qeyd edək ki, Samirə Məmmədova dünyasını dəyişməmişdən əvvəl Dilarə Bağırovaya qarşı mülki iddia qaldırmışdı. Həmin iddiada o, Dilarə Bağırovadan girov qoyulan əşyaların geri qaytarılmasını tələb edib.

Şikayətdən aydın olur ki, girov müqabilində Samirə Məmmədova Dilarə Bağırovaya 47 000 manat borclanıb. Ekspertiza bəyannaməsində girov qoyulan əşyaların dəyərini 200 000 manat qiymətləndirib.

Samirənin vəfatından sonra onun hüquqi varisi kimi həyat yoldaşı Xalid Niyazov məhkəmə mübahisələrində iştirak edib.

Şikayət üzrə bir neçə dəfə məhkəmə baxışı keçirilib.

Nəhayət, Bakı Apellyasiya Məhkəməsi Xalid Niyazovdan 47 000 manatın Dilarə Bağırovaya, Bağırovadan isə girov qoyulan əşyaların Xalid Niyazova verilməsinə dair qətnamə çıxarıb.

İcra orqanlarının müdaxiləsi

Qətnamənin çıxarılmasına baxmayaraq icra prosesində problemlər müşahidə edilib. İcra vərəqəsi Binəqədi Rayon İcra Şöbəsinə göndərilib. Dilarə Bağırova əşyaları təhvil verməyə hazır olmasına baxmayaraq, qarşı tərəf pulu gətirmədiyi üçün əşyalar geri qaytarılmayıb. Qətnamədə hər iki tərəfin eyni anda öhdəliklərini yerinə yetirməsi tələb olunsa da, bu şərtə əməl olunmayıb.

Sonradan məlum olub ki, Bağırovaya məxsus avtomobillərin hamısına həbs qoyulub və cərimə meydançasına yerləşdirilib. Bağırova iddia edir ki, belə bir addım ədliyyə nazirinin göstərişi ilə icra şöbəsi atıb.

Vəkil və nazir nüfuzu

İddialara əsasən, qarşı tərəfin vəkili Muxtar Mustafayev nazirlə yaxın tanışıdır. Vəkil məhz bu yaxınlıqdan istifadə edərək icra orqanlarına təzyiq göstərib, onların məhkəmə qərarını icra etməsinə mane olub.

Şikayətçi Dilarə Bağırova məsələ ilə bağlı Ədliyyə Nazirliyinə və Ombudsmana müraciət etməyi planlaşdırır.

Cari vəziyyət

Əgər iddialar həqiqətə uyğundursa, bu fakt onu göstərir ki, ölkəmizdə hələ də bəzi məmurlar, yüksək vəzifəli şəxslər məhkəmə qərarlarının icrasına, onların qanuna uyğun və ədalətli şəkildə həyata keçirilməsinə əngəllər törədirlər. Bir tərəfdən məhkəmə qərarlarının icrasında ləngimələr, digər tərəfdən isə yüksək vəzifəli şəxslərin şəxsi tanışlıqlardan istifadə edərək qanunun aliliyinin təmin edilməsinə əngəl olması hüquqi dövlətin təməl prinsiplərinə ziddir.

Sfera.az məsələ ilə bağlı Ədliyyə Nazirliyindən rəsmi mövqe gözləyir.

Vətəndaş Ədliyyə Nazirliyindən şikayətçidir - TƏFƏRRÜATLAR