Azərbaycan Lapşin üçün vəkil təyin etdi
Azərbaycanın ərazi bütövlüyünün parçalanmasına açıq çağırışlar etməkdə təqsirləndirilərək həbs edilən və dünən ölkəmizə ekstradisiya olunan israil əsilli bloqer Aleksandr Lapşinin cinayət işi üzrə bəzi məlumatlar bəlli olub.
"Qafqazinfo"nun əldə etdiyi məlumata görə, A.Lapşin barəsində cinayət işinin istntaqını Baş Prokurorluğun Ağır Cinayətlərə Dair İstintaq İdarəsi tərəfindən aparılır. 2016-cı il iyulun 1-də baş prokurorun birinci müavini Rüstəm Usubovun təqdimatı əsasında Nəsimi Rayon Məhkəməsinin hakimi Şəlalə Həsənovanın qərarı ilə A.Lapşin barəsində axtarışa verilməklə qiyabi həbs qəti imkan tədbiri seçilib.
A.Lapşinə Azərbaycan dövləti tərəfindən vəkil təyin olunub. Vəkil Səfər Hüseynov onun müdafiəçisi olub. Bu gün isə S.Hüseynov A.Lapşinə təqdim ediləcək. Bloqer Azərbaycan dövləti tərəfindən təyin olunan vəkildən imtina da edə bilər, razılaşıb müqavilə də bağlaya bilər.
S.Hüseynov "Qafqazinfo"ya açıqlamasında bunu təsdiqləyib və bildirib ki, hələ ki A.Lapşinlə görüşməyib: "Onunla görüşəcəyəm. Hazırda harada saxlanılmasını bilmirəm. Başqa bir məlumatım yoxdur. Lapşinin işi ilə bağlı hələ heç nə bilmirəm. Bundan sonra yenə onun vəkili kimi təyin olunub-olmayacağımı da bilmirəm".
