Bakıda vəzifə vəd etdi, 85 min manatını mənimsədi
Bakıda özünü xüsusi hallar və əlaqələr üzrə vəzifəli şəxs kimi təqdim edərək dələduzluq edən şəxs polis tərəfindən saxlanılıb.
Sfera.az xəbər verir ki, Daxili İşlər Nazirliyinin mətbuat xidmətinin rəisi Elşad Hacıyevin verdiyi məlumata görə, 45 yaşlı Məmmədov Tural Səməd oğlu 2021-ci ildə tanışlarından birinə nüfuzlu vəzifə, aviasiya şirkətində rəhbər post vəd edərək onun 85 min manat pulunu aldatma və etibardan sui-istifadə yolu ilə ələ keçirib.
T.Məmmədov son 4 il ərzində zərərçəkmişə müxtəlif bəhanələrlə işi guya artıq həll etdiyini, əmr gecikməsinin yoxlamalarla əlaqəli olduğunu bildirərək yalan vədlərini dəyişib və başqa vəzifələr təklif edib.
Aldadıldığını anlayan vətəndaş Xəzər Rayon Polis İdarəsinə müraciət edərək T.Məmmədovun əməllərindən şikayətçi olub.
Barəsində həbs qətimkan tədbiri seçilən Tural Məmmədovun digər dələduzluq əməllərinin də olub-olmaması istintaqla araşdırılır. Hazırda istintaq hərəkətləri davam etdirilir.
Bəsti Rəfizadə
Sfera.az
