Sələmçini öldürən hərbçinin cəzası ağırlaşdırıldı

Bakı Apellyasiya Məhkəməsində Bakıda sələmə pul verən şəxsi öldürməkdə təqsirləndirilən hərbi qulluqçu Elvin Əsədovun barəsindəki hökmdən verilən apellyasiya protesti üzrə məhkəmə prosesi başa çatıb.

Sfera.az Oxu.az-a istinadla xəbər verir ki, hakim Murad Məmmədovun sədrliyi ilə keçirilən prosesdə protest araşdırılaraq təmin edilib.

Qərara görə, Bakı Ağır Cinayətlər Məhkəməsinin hökmü ləğv edilib və təqsirləndirilən şəxsin cəzası 12 ildən 14 ilə qaldırılıb.

Qeyd edək ki, qətl hadisəsi ötən il dekabrın 30-da paytaxtın Nəsimi rayonu, Cavadxan küçəsində baş verib. Elvin Əsədov tanışı Zamiq Cabbarovdan sələmə pul götürüb. Borc faizlə 2500 manat olduğundan o, həmin məbləği qaytara bilməyib. Tərəflər arasında buna görə mübahisə yaranıb və E.Əsədov Z.Cabbarovu qətlə yetirib.