Azərbaycan ordusunun həkiminin silsilə cinayətləri üzə çıxdı: Onu DTX-da axtardılar, ancaq... - FOTO

Sfera.az bildirir ki, zərərçəkmiş şəxslərin criminal.az saytına verdiyi məlumata görə, o, 10 nəfərdən artıq insana özünü DTX əməkdaşı kimi təqdim edib. DTX-da mülki işdə işləyəcəklərini, kursantlara isə "Mitsubishi-L200" markalı maşın veriləcəyinə inandırıb. Guya həmin avtomobillə işçiləri Müşfiq qəsəbəsinə aparıb gətirəcəklər. 
 
Ötən il noyabrın 10-da onları da DTX-da işə düzəldəcəyini vəd edərək hərəsindən 500 manat alıb. Onları inandırıb ki, 500 manatı da noyabrın 18-də işə çıxandan sonra ödəyəcəklər. Deyib ki, geyimləri, maaş kartları artıq hazırdır. Dekabrın 1-də isə açılış mərasimi olmalı, DTX rəisi Mədət Quliyev də açılışda iştirak etməlidir. Pul aldığı adamlara deyib ki, dekabrın 1-də "Razin"də olsunlar, "Mercedes-Sprinter" markalı avtobus gəlib aparacaq. Onun sözünə inanan insanlar da təyin edilən vaxtda həmin yerdə olublar. Bir-iki saat gözləsələr də, avtobus gəlməyib. A.Kərimovun mobil nömrəsinə zəng etdikdə isə bağlı olub. Onun yaşadığı mənzilə gediblər, orada bildiriblər ki, həmin adam kirayədə yaşayırmış və artıq yoxdur.
 
Sonradan zərərçəkmiş şəxslər öyrəniblər ki, A.Kərimov DTX əməkdaşı yox, Müdafiə Nazirliyinin zabitidir. A.Kərimovun Ağcabədi rayonunda yerləşən Hərbi Hospitalın həkimi olduğu məlum olub. Aldadılan insanlar Daxili İşlər Nazirliyinin 102 xidmətinə zəngdən sonra onlar Xətai Rayon Polis İdarəsinin 36-cı polis bölməsinə yönləndiriliblər. Bölmədə faktla bağlı araşdırma başlanıb. 
 
A.Kərimovun rəisi Hüseyn Əliyev criminal.az saytına bildirdi ki, A.Kərimov yüzlərlə insanı aldadaraq qaçıb və onun barəsində axtarış elan olunub. Rəisin sözlərinə görə, A.Kərimov hospitalda stomotoloq idi. Hərbi hissədə də bir dəfə kompyüter oğurlayıb. Bundan əlavə zabit yoldaşının şəxsiyyət vəsiqəsi ilə bir nəfəri aldadıb və həmin şəxs gəlib pulunu aldadılan zabitdən istəyirdi. Dəfələrlə xəbərdarlıq olunsa da, barəsində tədbir görülsə də, öz çirkin əməlindən əl çəkmirdi.