Bu şəxslər dörd ilədək azadlıqdan məhrum ediləcək – Hüquqşünas AÇIQLADI
Azərbaycanda azyaşlı qızların valideynləri tərəfindən məcbur ərə verilməsi halları tez-tez müşahidə edilir.
Bəs övladlarını ərə getməyə məcbur edən valideynlərə qarşı hansı cəza tədbirləri görülə bilər?
Mövzu ilə bağlı Sfera.az-a danışan hüquqşünas Şamil Paşayev bildirib ki, Azərbaycan Respublikasının Konstitusiyasına əsasən, hər kəsin qanunla nəzərdə tutulmuş yaşa çatdıqda ailə qurmaq hüququ var və nikah könüllü razılıq əsasında bağlanılır:
“Heç kəs zorla evləndirilə (ərə verilə) bilməz. Erkən nikah və erkən nikaha məcbur edilmə hallarına, əsasən, qızlar arasında rast gəlinir. Heç kəs razılığı olmadan nikaha daxil olmağa məcbur edilə bilməz. Hər hansı şəxsin öz iradəsinin əleyhinə nikaha daxil olmasına məcbur edilməsi qadağan edilir. Konstitusiyamızın yuxarıda qeyd olunan normasına əsasən, Cinayət Məcəlləsinin (CM) 176-1.1-ci maddəsi qadını nikaha daxil olmağa məcbur etməni, 176-1.2-ci hissəsi isə nikah yaşına çatmayan qadını nikaha daxil olmağa məcbur etməni özündə ehtiva edir və sanksiyalaşdırılıb".
Hüquqşünas qeyd edib ki, qadını nikaha daxil olmağa məcbur etmə iki min manatdan üç min manatadək cərimə və ya iki ilədək müddətə azadlıqdan məhrum etmə ilə cəzalandırılır.
“Eyni əməllər nikah yaşına çatmayan şəxs barəsində törədildikdə, üç min manatdan dörd min manatadək miqdarda cərimə və ya dörd ilədək müddətə azadlıqdan məhrum etmə ilə cəzalandırılır”.
Ülkər Abdurahmanlı
