Rasim Məmmədov məhkəmədə SON SÖZ dedi: “Bəraət istəyirəm...”

Bakı Ağır Cinayətlər Məhkəməsində “Baku Steel Company”nin sabiq rəhbəri Rasim Məmmədovun cinayət işi üzrə məhkəmə prosesi keçirilib.

Sfera.az xəbər verir ki, hakim Leyla Məmmədovanın sədrliyi ilə baş tutan iclasda Rasim Məmmədova sön söz verilib. O, özünü təqsirli bilməyib və məhkəmədən bəraət istəyib:

“Atam 5 uşaq böyüdüb, beşi də alimdir. Bizim nəsildə cinayətkar olmayıb, heç kimin malını talamamışıq. Bu ittihamlardan belə çıxır ki, 10 ildə  bütün cinayətləri törətmişəm, zavodu talamışam. Ortada sübut da yoxdur. Mən arsız məmur deyiləm ki, işdən çıxarılam, sonra gedəm yığdığımı xərcləyəm. Mən iş adamıyam, işimin başında olmalıyam. Başa düşə bilmirəm ki, nə etmişəm? Mən cinayət törətməmişəm. Bəraət istəyirəm.“

Daha sonra məhkəmə müşavirəyə yollanıb. 

Qeyd edək ki, Rasim Məmmədov Dövlət Təhlükəsizlik Xidməti (DTX) tərəfindən həbs olunub. O, Cinayət Məcəlləsinin 179.4 (mənimsəmə və ya israfetmə, xüsusilə külli miqdarda ziyan vurmaqla törədildikdə), 193.3.2 (xüsusilə külli miqdarda gəlir əldə etməklə yalan sahibkarlıq), 308.2 (vəzifə səlahiyyətlərindən sui-istifadə etmə, ağır nəticələrə səbəb olduqda) və 313-cü (vəzifə saxtakarlığı) maddələri ilə ittiham olunub.

Nəzrin