Bakı Ağır Cinayətlər Məhkəməsində 2013-cü ildə paytaxtın Yasamal rayounda İsmayıl Zeynalovu boğaraq öldürməkdə ittiham olunan Zaur Sadıxovun cinayət işi üzrə məhkəmə prosesi keçirilib.

Sfera.az xəbər verir ki, prosesdə şahidlər Vidadi Abdulrəhimov  və Alik Bədirov dindirilib.

Şahid Alik Bədirov ifadəsində bildirib ki, o Zauru “parkovka”da işləyərkən tanıyıb. Bu ilin martında Baş Prokurorluğa aparılan Alik bildirib ki, Zaurun adam öldürdüyündən xəbərdar olmayıb:

“Mənə dedilər ki, guya Zaur adam öldürüb. Dedim bilmirəm, məni “Bandotdel”ə apardılar, zorla kağızlara imza atdırdılar. İstintaqda mənə dedilər ki, guya Zaur mənə İsmayılı boğub öldürdüyünü deyib. Dedim, elə bir şey deməyib. İfadəmi zorla yazdırdılar, altından qol çəkdim”.

A.Bədirov həmçinin ifadəsində bildirib ki, Zaur Sadıxov narkotik istifadəçisi olub və o, da Zaurun təkidi ilə narkotik istifadəsinə başlayıb.

Daha sonra növbəti şahid Vidadi Abdulrəhimov dindirilib. O, Zaurla bir yerdə taksi sürücüsü olaraq işləyib:

“Saat axşam 20 radələrində  müştəri gözləyirdim. İsmayıl gəldi, Zauru soruşdu. 5 dəqiqə keçməmiş Zaur gəldi, maşınına minib getdilər. Səhəri gün eşitdim ki, İsmayıl ölüb. Meyitini yoldan tapıblar”.

Xatırladaq ki, qətl 2013-cü ilin martın 30-da törədilib. Paytaxtın Yasamal rayonu ərazisində İsmayıl Zeynalovun üzərində zorakılıq əlamətləri olan meyitinin aşkar edilməsi faktı ilə bağlı Yasamal rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb, həyata keçirilmiş istintaq və əməliyyat tədbirlərinə baxmayaraq cinayət törədən şəxs və ya şəxsləri müəyyən etmək mümkün olmadığından 23.04.2019-cu il tarixdə cinayət işinin icraatı dayandırılıb.

Baş Prokurorluğun İstintaq idarəsi tərəfindən cinayət işi yenidən öyrənildikdən sonra icraat təzələnib, həyata keçirilmiş çoxsaylı intensiv istintaq-əməliyyat tədbirləri nəticəsində əldə edilən sübutlarla Bakı şəhər sakini Zaur Sadıxov şübhəli şəxs qismində tutularaq istintaqa cəlb edilib. İttihama görə, 2013-cü ilin martın 29-da saat 21 radələrində tanışı Zaur Sadıxov tanışı İsmayıl Zeynalovla narkotik vasitələrin satışı ilə məşğul olan Alik Bədirovun yaşadığı ünvanda narkotik vasitə qəbul etdikdən sonra evə qayıdarkən avtomobildə aralarında mübahisə baş verib.

Zaur avtomobili yolda saxlayaraq maşından enməyə çalışan İsmayıla yaxınlaşaraq onun bədəninin müxtəlif nahiyyələrinə təpiklə zərbələr vurub, əlləri ilə onu boğaraq öldürüb, daha sonra narkotik vasitənin doza həddini aşması səbəbi ilə ölməsi görüntüsünü yaratmaq məqsədilə küçədə uzanıqlı formada qoyaraq hadisə yerindən uzaqlaşıb. Həmçinin törətmiş olduğu cinayətin izlərini itirmək məqsədilə İsmayıl Zeynalova məxsus mobil telefonu və köynəyi istintaqla müəyyən edilməyən yerlərə atıb.

Nəzrin