Bakı Ağır Cinayətlər Məhkəməsində iş otağında intim videoları yayılan Fövqəladə Hallar Nazirliyinin (FHN) Dövlət Yanğından Mühafizə Xidməti rəisinin sabiq köməkçisi, polkovnik Zaur Mirzəyevin məhkəmə prosesinin hazırlıq iclası keçirilib.

Sfera.az xəbər verir ki, hakim Məhəmməd Əkbərovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Bundan sonra müdafiəçilər vəsatət qaldırıb.

Zərərçəkmiş şəxs qismində tanınan Aytən Nəsirovanın müdafiəçisi Yaser Abdullayev bildirib ki, yayılan görüntülər ictimailəşdirilib və nəticədə Aytən Nəsirova barəsində mənfi ictimai rəy formalaşıb. Vəkil informasiya kirliliyinin qarşısının alınması məqsədi ilə məhkəmənin mətbuata açıq keçirilməsini istəyib. Təqsirləndirilən şəxsin vəkili isə vəsatət qaldıraraq məhkəmənin mətbuata qapalı formada keçirilməsini tələb edib.

Daha sonra məhkəmə müşavirə otağına yollanıb. Müşavirədən qayıdan hakimlər təqsirləndirilən şəxsin vəkilinin vəsatətini təmin edərək məhkəmənin mətbuata qapalı formada keçirilməsi haqda qərar veriblər.

Məhkəmənin növbəti iclası dekabrın 21-nə təyin olunub.

Xatırladaq ki, Z. Mirzəyev bu il avqustun 17-də saxlanılıb və məhkəmənin qərarı ilə barəsində həbs qətimkan tədbiri seçilib. O, Cinayət Məcəlləsinin 156.2.1 (şəxsi həyatın toxunulmazlığını pozma), 312-1.1-ci (vəzifəli şəxsin qərarına qanunsuz təsir göstərə - nüfuz alveri) və 309.2-ci (vəzifə səlahiyyətlərini aşma) maddələri ilə ittiham olunur.

Nəzrin