Kişilərlə yazışan evli bacısını qətlə yetirmiş qardaşa HÖKM OXUNDU
Telefonda başqa kişilərlə danışdığı üçün evli bacısı, 1998-ci il təvəllüdlü Nəcibə İsayevanı bıçaqlayaraq qətlə yetirən 1992-ci il təvəllüdlü Rüfət Quliyev 10 il müddətinə azadlıqdan məhrum edilib.
Sfera.az xəbər verir ki, hadisə ötən il dekabrın 4-də Şabran rayonunun Çaraq kəndində baş verib.
Belə ki, Nəcibə əri Xangəldi ilə münasibəti pisləşdiyindən 2018-ci ildən ata evində yaşamağa başlayıb. Münasibətinin pisləşməsinə səbəb isə Xangəldinin bir neçə dəfə onu başqa kişilərlə telefonla danışarkən tutması olub. Cütlük ayrı yaşasa da, rəsmən boşanmayıblar.
Nəcibə ata evinə köçdükdən sonra qardaşı Rüfət bundan sonra bir daha belə hala yol verəcəyi təqdirdə onu öldürməklə hədələyib və telefondan istifadəni qadağan edib. 4 dekabr günü Rüfət örüşdən qayıtdıqdan sonra Nəcibənin harada olması ilə maraqlanıb və onu evin hamam otağında telefon istifadə edərkən tapıb. Telefonun mesaj bölməsinə baxdıqda adı “Ürəyim” kimi qeyd edilmiş şəxslə sevgi mesajlarını görüb.
O, Nəcibədən özünü öldürməsini tələb edib, əks halda bunu özünün edəcəyini xatırladıb. Qadın bağışlanmaq üçün yalvarsa da, Rüfət qarın və bel nahiyyəsindən 15 bıçaq zərbəsi vuraraq Nəcibəni qətlə yetirib.
Nəzrin
