Kiyevdə azərbaycanlını öldürən şəxslərin məhkəməsi başladı

Bakı Ağır Cinayətlər Məhkəməsində Ukrayna Respublikasının paytaxtı Kiyev şəhərindəki restoranlardan birində Azərbaycan vətəndaşı Davud Ağayevi “Makarov” markalı tapançadan açılan atəşlə qətlə yetirməkdə şübhəli bilinən Yasin Həsənovun cinayət işi üzrə məhkəmə prosesi keçirilib.

Sfera.az xəbər verir ki, hakim Telman Hüseynovun sədrliyi ilə keçirilən prosesdə hakim iş üzrə tanınan 7 şahiddən ikisinin Azərbaycan və beşinin Ukrayna vətəndaşı olduğunu bildirib.

Həmin şahidlərin məhkəmədə canlı ifadə verməsi üçün Ukrayna tərəfinə sorğu göndərilib. Hakim bildirib ki, müharibə səbəbindən poçt rabitəsi qırılıb və cavab gecikir. Ukrayna hökumətinə şahidlərin iştirakının təmin olunması üçün yenidən sorğu göndəriləcəyi qeyd edilib.

Xatırladaq ki, hadisə 2018-ci il iyulun 3-də baş verib. İki il sonra Baş İdarə əməkdaşlarının keçirdikləri əməliyyat zamanı Ukrayna Cinayət Məcəlləsinin 115-ci (qəsdən adam öldürmə) maddəsi ilə beynəlxaq axtarışda olan paytaxt sakini Yasin Həsənov saxlanılıb. Araşdırma zamanı məlum olub ki, Yasin Həsənovun qətlə yetirdiyi şəxslə əvvəlcədən ədavəti olub. Belə ki, 2013-cü ildə Davud Ağayev Yasin Həsənova Kiyev şəhərində odlu silahdan atəş açaraq onu yaraladığından sonuncu intiqam almaq məqsədi ilə bir neçə il sonra qeyd edilən hadisəni törədib. Yasin Həsənov iş üzrə özünü təqsirli bilmədiyini deyib.

İnci