Kondisioner alarkən nələrə diqqət etməliyik? – AİB sədrindən açıqlama
12:22 / 16.06.2021
2297
"Kondisioner bazarında vəziyyət ildən-ilə
yaxşılaşır. Əvvəl daha çox şikayət gəlirdi”.
Bunu Sfera.az-a açıqlamasında Azad İstehlakçılar
Birliyinin rəhbəri Eyyub Hüseynov deyib. O bildirib ki, buna baxmayaraq,
bazarda müəyyən problemlər də mövcuddur:
"Vətəndaş 30 kvadrat metrlik mənzilini
soyutmaq istəyir. Kondisioner alan zaman bildirirlər ki, məhsul 40 kvadrat
metri də əhatə edə bilər. İstehlakçı başa düşmür ki, kondisionerin sənədində
kub metr göstərilir. Əslində 30 kvadrat metrlik mənzilə 40 kub metrlik
kondisioner uyğun olmur. Satıcı qeyd edilən ölçünün kub metr olduğunu demir, yəni
evin hündürlüyü nəzərə alınmayıb. İstehlakçılar sənədləri nəzərdən keçirən
zaman evin həcmini düşünməlidirlər. Çox təəssüflər olsun ki, Azərbaycana gətirilən
kondisionerlərin sənədlərində bu məsələ aydın qeyd olunmayıb və gizlədilir. Bu
istiqamətdə də aldadılma halları müşahidə edilir”.
Müsahibimiz hazırda keyfiyyətsiz kondisionerlər
satan, vətəndaşları aldadan şirkətlərin olduğunu qeyd edib:
E.Hüseynov bildirib ki, bir neçə
qanunvericilik aktına görə, o cümlədən İstehlakçıların müdafiəsi və hüquqları
haqqında qanuna uyğun olaraq, ölkənin əmtəə bazarına çıxarılan bütün malların sənədlərində
xarici dillə yanaşı, Azərbaycan dilində də məlumatlar öz əksini tapmalıdır: "Əgər
kondisionerlərin sənədində öz dilimizdə məlumat yoxdursa, bu qanun
pozuntusudur. Təəssüf ki, bu problem də müşahidə edilir. Kondisioner alan zaman
istehlakçılar ilk növbədə onun istehsal olunma tarixinə baxsınlar”.